اولمپیا(انٹرنیشنل پریس ایجنسی) امریکی ریاست واشنگٹن میں ملک میں کورونا وائرس سے پہلی ہلاکت کی تصدیق کی گئی ہے ،حکام کے مطابق ریاست کے سب سے بڑے شہر سیاٹل کی کنگ کاؤنٹی میں ایک50ّسالہ خاتون جوکہ شہر کے لائف کیئرہیلتھ سنٹرمیں زیرعلاج تھیں وفات پاگئی ہیں اسی سنٹرمیں ایک اور 70سالہ خاتون کو انتہائی تشویشناک حالت میں ہسپتال منتقل کیا گیا ہے۔

کاؤنٹی حکام کے مطابق ہیلتھ سنٹر کے50سے زائد ملازمین کے ٹیسٹ جاری ہیں خدشہ ہے کہ ہیلتھ سنٹرمیں کام کرنے والے بھی وائرس سے متاثر ہوئے ہیں تاہم ابھی حتمی طور پر کچھ نہیں کہا جاسکتا.ادھر سینٹرز فار ڈیزیز کنٹرول اینڈ پریوینشن (سی ڈی سی)نے ریاستی حکومتوں پر زور دیا ہے کہ وہ ملک بھر میں ریاست اور کاؤنٹی سطح پر قائم نرسنگ ہومزاور بزرگ شہریوں کے لیے قائم خصوصی رہائشی مراکزمیں خصوصی اقدامات کریں کیونکہ پہلے سے مختلف بیماریوں کا شکار بزرگ شہریوں کے وائرس کا شکار ہونے کے امکانات زیادہ ہیں کیونکہ کمزورمدافعتی نظام کی وجہ سے ان میں وائرس کے پھیلاؤ کے امکانات زیادہ ہیں اسی طرح سی ڈی سی نے نرسنگ ہومز اور بزرگ شہریوں کے خصوصی رہائشی مراکزمیں کام کرنے والے کارکنوں کے بھی ٹیسٹ کروانے اور انہیں خصوصی اقدامات کی ہدایات جاری کی گئی ہیں.کورونا وائرس کے نئے کیسز سامنے آنے کے بعد، امریکہ نے ایران کے سفر پر پابندی کا اعلان کیا ہے اور ساتھ ہی اٹلی اور جنوبی کوریا کے کچھ علاقوں کے سفر سے متعلق انتباہ جاری کیا ہے نئی پابندیوں کا اعلان امریکی نائب صدر مائیک پینس نے کیا۔

انہوں نے کہا کہ امریکہ میں 22 افراد نئے کرونا وائرس کا شکار ہوئے ہیں جب کہ مزید کیسز سامنے آسکتے ہیں.امریکہ کے صحت اور انسانی خدمات کے محکمے کے وزیر، الیکس ازار نے کہا ہے کہ ان علاقوں کی جانب جہاں یہ مرض سنگین صورت اختیار کیا گیا ہے، وہاں کا سفر نہیں کرنا چاہیے، یہی بہتر حکمت عملی ہو گی‘ امریکہ میں ایک ہلاکت کی اطلاع کے بعد ٹرمپ نے وائرس سے متعلق اپ ڈیٹ فراہم کرتے ہوئے کہا کہ یہ ایک خاتون تھی جن کی عمر 50 برس کے قریب تھی۔

صدر نے کہا کہ امریکیوں کو زیادہ پریشان ہونے کی ضرورت نہیں ہے انھوں نے کہا کہ ملک میں تقریباً 22 نئے افراد ہیں جن میں مرض کی علامات ظاہر ہوئی ہیں‘محکمہ صحت کے اہلکاروں کے مطابق، اب تک امریکہ میں 66 افراد میں کرونا وائرس کی تصدیق ہو چکی ہے. ریاست واشنگٹن کے گورنر جے انسلی نے ایک بیان میں کہا کہ یہ افسوس ناک دن ہے کہ واشنگٹن سے تعلق رکھنے والی شہری وائرس کی وجہ سے ہلاک ہو گئی ہیں ہم اہل خانہ اور احباب سے تعزیت کا اظہار کرتے ہیںاور ہم کوشش کر رہے ہیں کہ یہ بات یقینی بنائی جا سکے کہ کوئی بھی فرد اس وائرس کی بنا پر ہلاک نہ ہو۔