واشنگٹن (این این آئی)امریکہ نے مقبوضہ کشمیر میں سیاسی رہنمائوں کی مسلسل نظربندی اور انٹرنیٹ کی معطلی پر ایک بار پھر تشویش کااظہار کیا ہے۔ کشمیرمیڈیا سروس کے مطابق جنوبی اور وسطی ایشیا کے لیے امریکہ کی نائب وزیر خارجہ ایلس ویلز نے ایک ٹویٹ میںامیدظاہر کی کہ خطے کے
حالات جلد معمول پر آئیں گے۔ انہوںنے امریکہ سمیت15 غیر ملکی سفیروں کے حالیہ دورہ مقبوضہ کشمیر کو ایک اہم قدم قراردیتے ہوئے کہا ہمیں سیاسی رہنمائوں اورمقامی شہریوں کی مسلسل گرفتاری اور انٹرنیٹ پر پابندیوں پر تشویش ہے ۔ بھارت نے گزشتہ ہفتے امریکہ سمیت 15غیر ملکی سفیروں کوسخت نگرانی میںمقبوضہ کشمیر کا دورہ کرایا تھاجہاں ان کی ملاقات چند مخصوص سیاسی نمائندوں اور فوجی حکام سے کرائی گئی۔ ایلس ویلز 15سے 18جنوری تک بھارت کا دورہ کررہی ہیں جس کے بعد وہ پاکستان جائیں گی۔ بھارت نے گزشتہ سال 5اگست کو مقبوضہ کشمیر کی خصوصی حیثیت ختم اور دفعہ 370کو منسوخ کئے جانے کے بعد علاقے میںسخت پابندیاں عائد کی تھیں اور پوری سیاسی قیادت سمیت ہزاروں کشمیریوں کو گھروں یا جیلوں میں نظربند کیا تھا۔
