برلن(این این آئی)جرمن شہریوں نے امریکی صدر ڈونلڈ ٹرمپ کو دنیا کے امن کے لیے سب سے بڑا خطرہ قرار دے دیا ہے جبکہ شمالی کوریا کے رہنما کم جونگ اْن دوسرے نمبر پر دنیا کے امن کے لیے بڑا خطرہ ہیں۔غیرملکی خبررساں ادارے کے مطابق ایک سروے میں کیے گئے سوال’’دنیا کے امن کے لیے سب سے بڑا خطرہ کون ہے؟‘‘ کے جواب میں 41 فیصد جرمن شہریوں نے ٹرمپ کا جبکہ صرف 8 فیصد نے ایرانی سپریم لیڈر آیت اللہ خامنہ ای کا نام لیا۔
جرمن نیوز ایجنسی کی جانب سے دسمبر 2019ء میں کرائے گئے اس سروے میں پانچ بڑے عالمی رہنمائوں سے متعلق سوالات کیے گئے تھے۔17 فیصد شہریوں نے شمالی کوریا کے رہنما کم جونگ اْن کو دوسرے نمبر پر دنیا کے امن کے لیے بڑا خطرہ قرار دیا۔آٹھ فیصد نے ایرانی سپریم لیڈر آیت اللّٰہ خامنہ ای اور روسی صدر پوٹن کا نام لیا جبکہ صرف سات فیصد نے چینی صدر شی جن پنگ کو عالمی امن کے لیے خطرہ قرار دیا۔
