اسلام آباد (مانیٹرنگ ڈیسک)’’را‘‘کے سابق چیف نے ایک انٹرویو کے دوران اعتراف کیا ہےکہ عمران خان ایک بہترین وزیر اعظم ہیں۔ اے ایس دولت نے کہا کہ فیصلہ سازی، خود اعتمادی اور قائدانہ صلاحیتوں کے اعتبار سے عمران خان بے مثال شخصیت ہیں۔سابق ریسرچ اینڈ اینالسز ونگ چیف اے ایس دولت نے اپنے انٹرویو میں مزید کہا کہ کشمیر دو طرفہ مسئلہ ہے، بھارت بھی مان چکا ہے کہ آگے بڑھنے کا واحد راستہ مذاکرات ہیں۔
انہوں نے کہا کہ مذاکرات کے لیے عمران خان ہی وہ شخصیت ہیں جن سے بات ہو سکتی ہے۔پاکستان کے وزیراعظم عمران خان ، پاکستان آرمی اور پاکستان کے آرمی چیف جنرل قمر جاوید باجوہ کے آپس میں تعلقات مثالی ہیں۔یہی وجہ ہے کہ وہ بہترین فیصلہ کر سکتے ہیں۔ ان کا کہنا تھا کہ ان کے آپس میں یہ مثالی تعلقات ہمارے لیے بہتر ہیں۔ اے ایس دولت نے کہا کہ عمران خان فیصلے خود کرتے ہیں، وہ کسی قسم کے سہاروں کے محتاج نہیں ۔
