بیروت (این این آئی)لبنان کے وزیراعظم سعد الحریری نے کہا ہے کہ ملک طویل عرصے تک حکومت کے بغیر نہیں رہ سکتا۔ سات ماہ سے حکومت سازی کے لیے مشاورت جاری ہے مگر اب اس میں مزید تاخیر کی گنجائش نہیں۔میڈیارپورٹس کے مطابق انہوں نے ملک کی ابتر معاشی صورت حال کے بارے میں بھی متنبہ کیا۔خیال رہے کہ گذشتہ برس مئی میں لبنان میں ہونیوالے پارلیمانی انتخابات کے بعد صدر میشل عون نے سعد حریری کو نئی کابینہ تشکیل دینے کی دعوت دی تھی مگر سیاسی جماعتوں کے درمیان پائے جانے والے

اختلافات کے باعث لبنان میں حکومت سازی کاعمل مسلسل تعطل کا شکار ہے۔بیروت میں صدارتی محل میں میشل عون اور سعد حریری نے ملاقات کے بعد کہا کہ ہم نے بہت تاخیر کردی۔ اب حکومت سازی کا عمل شروع کردینا چاہیے۔ حکومت کی تکمیل کے بغیر ملک آگے نہیں بڑھ سکتا۔سعد حریری کا کہنا تھا کہ ہمیں کم سے کم وقت میں حکومت سازی کا عمل مکمل کرنا ہوگا۔ الحریری نے 13 دسمبر کو کہا تھا کہ سال 2018ء کے آخر میں حکومت سازی کا امکان ہے تاہم اس حوالے سے تا حال کوئی عملی پیش رفت نہیں ہوسکی۔