دبئی(آن لائن) متحدہ عرب امارا ت میں ورک ویزا کے حصول کیلئے نئے قانون کا اطلاق (آج )بروز پیر سے ہوگا۔ٖٖٖغیر ملکی میڈیا رپورٹ کے مطابق اتوار کو متحدہ امارات حکام کی جانب سے جاری کردہ اعلامیہ میں کہا گیا کہ ورک ویزے سے متعلق نئے قانون کا اطلاق(آج)پیر سے ہوگا، ورک ویزا حاصل کرنے والے خواہشمند افراد کو اپنے ملک کی پولیس سے کیریکٹر سرٹیفیکٹ لینا ہوگا۔
ورک ویزہ لینے والے افراد کو اماراتی سفارت خانے سے اس کی تصدیق بھی کرانی ہوگی جب کہ کیرئیر سرٹیفکٹ کا اطلاق سرٹیفکٹ لینے والے شخص کے اہلخانہ پر نہیں ہوگا۔متعلقہ حکام نے اپنی رپورٹ میں واضح کہا ہے کہ سیاحوں اور طالبعلموں پر کیرئیر سرٹیفکٹ کا اطلاق نہیں ہوگا جب کہ اماراتی حکومت کا کہنا ہے کہ نئے قانون کا مقصد ملک میں جرائم پیشہ افراد کے داخلے کو روکنا ہے۔دبئی پولیس کے کرمنل انویسٹی گیشن کے اسسٹنٹ کمانڈر ان چیف میجر جنرل خلیل ابراہیم کا کہنا ہے کہ غیرملکی شہریوں کا اپنے ممالک سے سرٹیفکٹ کے حصول کا مقصد متحدہ عرب امارات میں جرائم کی روک تھام اور اس کا خاتمہ ہے۔انہوں نے کہا کہ نئے طریقہ کار سے ایسے افراد جو جرائم میں ملوث ہیں انہیں اپنے ملک میں ہی جرائم سے صاف ہوکر یو اے ای میں کام کرنے کی اجازت ہوگی۔
