بیجنگ /نئی دہلی (مانیٹرنگ ڈیسک) چین نے کہا ہے کہ پاکستانی وزیر اعظم شاہد خاقان عباسی کاڈیووس میں عالمی اقتصادی فورم میں چین پاکستان اقتصادی راہداری کے حوالے سے موقف انتہائی اہمیت کا حامل ہے ٗ بھارت مناسب رویہ اپنائے ٗ چین ہر متعلقہ ملک کے ساتھ باہمی تعاون کرتے ہوئے ترقی کی منازل طے کرنے کو تیار ہے۔پیر کو چین کی وزارت خارجہ کی ترجمان نے میڈیا سے گفتگو کے دوران ایک سوال کے جواب میں کہا کہ

چین پاکستان اقتصادی راہداری کے حوالے سے پاکستانی وزیر اعظم شاہد خاقان عباسی کا بیان انتہائی اہمیت کا حامل ہے اور ہم نے اس حوالے سے رپورٹس کو قریبی نگا ہ سے دیکھا ، اپنے بیان میں شاہد خاقان عباسی نے بیلٹ اینڈروڈ منصوبے کی اہمیت کے بارے میں انتہائی زبردست بات کی جس پر چین کو پاکستان سے دوستی پر فخر ہے ۔انہوں نے کہاکہ چین کا پیش کردہ بیلٹ اینڈروڈ منصوبہ کا بنیادی مقصد بین الاقوامی تعاون کو مضبوط بنانے اور انفراسٹرکچر کے انٹرکنکشن اور باہمی تعاون پر توجہ مرکوز کرکے ترقیاتی تعاون کو مضبوط بنانے اور فروغ دینا ہے، منصوبہ نے متعلقہ ممالک کو روزگار مواقع فراہم کئے ہیں، منصوبہ کسی ایک ملک یا خطے کیلئے نہیں بلکہ پورے عالم کے لئے ہے، چین ہر متعلقہ ملک کے ساتھ باہمی تعاون کرتے ہوئے ترقی کی منازل طے کرنے کو تیار ہے۔ چین اور بھارت مابین اختلافات پر ترجمان نے کہا کہ چین بھارت کے ساتھ مواصلات اور مذاکرات کے لئے تیار ہے۔ بھارت بھی مناسب رویہ اپنائے۔ دونوں اطراف کوئی قابل عمل طریقہ اپنائیں۔ تا کہ اختلافات کو ختم کرتے ہوئے مفادات بارے سوچا جا سکے ۔دوسری جانب پاکستان اور چین کے مابین سی پیک معاہدے پر بھارت کے اعتراض پر چین بھارت سے گفتگو پر رضا مند ہو گیا ہے،بھارتی اخبارکے دعو ے کے مطابق سی پیک پر اختلافات پر چین اس موضوع پر بھارت سے بات چیت کیلئے تیارہوگیا ہے۔بھارتی اخبار ہندوستان ٹائمز کے مطابق چینی وزیر خارجہ ہوا چوئنگ نے سی پیک معاملے پر بھارت سے بات چیت کرنے پر اتفاق کیا ہے اور اس معاملے کا جلد اور موثر حل نکالنے پر بھی رضامندی کا اظہار کیا ہے۔چینی وزیر خارجہ نے اس بات کابھی اعتراف کیا ہے کہ اختلافات ا پنی جگہ تاہم اختلافات کا موثر حل نکالنا دونوں ممالک کی ذمہ داری ہے۔

موضوعات:چین کی وزارت خارجہ کی ترجمان