ممبئی (مانیٹرنگ ڈیسک) بھارتی بزنس مین مکیش امبانی کا شمار دنیا کے امیر ترین افراد میں ہوتا ہے۔ اسی وجہ سے موصوف ہمیشہ خبروں میں رہتے ہیں کیونکہ لوگ ناصرف ان کے بارے میں بلکہ ان سے وابستہ چیزوں اور لوگوں کے بارے میں بھی جاننا چاہتے ہیں۔ اس کی مثال مکیش امبانی کا پرتعیش گھر بھی ہے، جس

میں دنیا کی ہر جدید ترین سہولیات موجود ہیں۔ یہی نہیں بلکہ اس گھر میں ان کے ذاتی استعمال کی 500 گاڑیاں اور ایک عدد ہیلی کاپٹر بھی ہے۔انڈیا کی سب سے بڑی انڈسٹری ریلائنس کے مالک مکیش امبانی کے بارے میں کہا جاتا ہے کہ وہ مٹی میں ہاتھ ڈالتے ہیں تو اسے سونا بنا دیتے ہیں۔ کچھ عرصہ قبل انہوں نے ٹیلی کام انڈسٹری میں قدم رکھتے ہوئے ریلائنس جیو متعارف کرایا اور اپنے صارفین کو مسلسل 6 ماہ تک فری کالز اور انٹرنیٹ کی سہولت فراہم کی تھی۔ان دنوں سوشل میڈیا اور مختلف انڈین چینلز پر مکیش امبانی کی ایک ویڈیو وائرل ہو چکی ہے، جس میں ان کے زیر استعمال گاڑیوں اور انھیں چلانے والے ڈرائیورز کے بارے میں بتایا جا رہا ہے۔ انڈین میڈیا رپورٹس کے مطابق مکیش امبانی کے ایک ڈرائیور کی تنخواہ تقریباً دو لاکھ روپے ماہانہ ہے۔ تاہم مکیش امبانی جیسے بڑے آدمی کا ڈرائیور بننا اتنا آسان کام نہیں ہے۔ اس کیلئے باقاعدہ مختلف کمپنیاں ہیں جہاں ڈرائیوروں کو ٹریننگ دی جاتی ہے۔ٹریننگ کے دوران ڈرائیورز کو مختلف ٹیسٹ پاس کرنے ہوتے ہیں۔ ان ٹیسٹوں میں پاس ڈرائیوروں کو شارٹ لسٹ کر کے ہی امبانی فیملی کے یہاں بھیجا جاتا ہے۔ یہ نوکری حاصل کرنے والے ڈرائیورز کو خوش قسمت ہی کہا جا سکتا ہے کیونکہ آج کل کے دور میں اچھی سے اچھی نوکری کے بھی دو لاکھ روپے ماہانہ نہیں ملتے۔