اسلام آباد(مانیٹرنگ ڈیسک)چین نے ایران کو اقتصادی راہداری منصوبے کا حصہ بنا لیا، 10ارب ڈالر قرض بھی دیدیا، اسرائیلی اخبار کی رپورٹ ، امریکہ سیخ پا۔ تفصیلات کے مطابق چین تیزی سے امریکہ کے متبادل کے طور پر سپر پاور بن کر سامنے آرہا ہے۔ خطے میں امریکی اہمیت کو گہری چوٹ پہنچانے کیلئے چین کئی اقدامات اٹھا چکا ہے مگر اب چین نے ایسا کام کر دیا ہے کہ امریکہ سیخ پا ہو چکا ہے۔ اسرائیلی اخبار کی رپورٹ کے مطابق چین نے ایران کو بھی اقتصادی راہداری کا حصہ بنا لیا ہے اور اسے 10ارب ڈالر قرض

فراہم کیا ہے جو امریکی پابندیوں کے باوجود ایران کو آگے بڑھنے میں مدد فراہم کرے گا۔ قرض کا معاہدہ چین کی فرم سی آئی ٹی آئی سی انویسٹمنٹ گروپ اور ایرانی بینکوں کے ایک وفد کے مابین بیجنگ میں طے پایا ہے جس کی سربراہی ایران کے مرکزی بینک کے صدر ولی اللہ سیف نے کی۔ ایران یہ رقم پانی، توانائی اور ٹرانسپورٹ کے منصوبوں پر خرچ کرے گا جبکہ اس قرض کے علاوہ چائنہ ڈویلپمنٹ بینک ایران میں انفراسٹرکچر اور دیگر پیداواری منصوبوںپر 15ارب ڈالر خرچ کرنے کے معاہدے پر بھی دستخط کر چکا ہے۔