سیؤل(این این آئی)شمالی کوریا میں زیر سمندر زلزلہ آیا ہے، یونائیٹڈ اسٹیٹ جیولوجیکل سروے کے مطابق مذکورہ زلزلے کی شدت ریکٹر اسکیل پر5اعشاریہ 6 ریکارڈ کی گئی ہے ۔ غیرملکی خبررساں ادارے کے مطابق زلزلہ پیما مرکز کا مزید کہنا تھا کہ زلزلے کا مرکز شمالی کوریا کے تیسرے بڑے شہر کھونگ جن سے 190کلو میٹر دور سمندر کی تہہ سے 500 کلو میٹر گہرائی میں ہے۔

یہ بھی کہا گیا ہے کہ سمندر میں مرکز ہونے کے باوجود اس سے سونامی کا کوئی امکان نہیں ہے۔امریکی ادارے پینٹا گون نے بھی شمالی کوریا میں زلزلہ آنے کی تصدیق کی ہے ۔پینٹا گون کا مزید کہنا تھا کہ مقام اور گہرائی سے اندازہ ہوا ہے کہ یہ زلزلہ قدرتی ہے اور شمالی کوریا کی جانب سے کسی قسم کے نیوکلیئر ٹیسٹ کے نتیجے میں نہیں آیا ہے، تاہم اس حوالے سے مسلسل جائزہ لیا جاتا رہے گا۔