اسلام آباد، دوحہ(مانیٹرنگ ڈیسک، این این آئی) دہشتگردوں کی مالی امداد کی روک تھام کیلئے قطر اور امریکہ میں معاہدہ طے، سعودی عرب سمیت 4عرب ممالک نے معاہدے کو ناکافی قرار دیتے ہوئے مطالبات تسلیم کئے جانے تک پابندیاں عائد رکھنے کا اعلان کر دیا۔ تفصیلات کے مطابق دہشتگردی کی مالی امداد کی روک تھام کیلئے قطر اور امریکہ میں معاہدہ طے پا گیا ہے۔

معاہدے کے تحت قطر اور امریکہ مل کر دہشتگرد تنظیموں کو ملنے والی مالی امداد کے نیٹ ورک کا پتہ لگائیں گے اور اس کی روک تھام کیلئے اقدامات بھی کرینگے۔ بین الاقوامی میڈیا رپورٹس کے مطابق امریکی وزیر خارجہ ریکس ٹلرسن نے آج دوحہ میں اپنے ہم منصب محمد بن عبدالرحمان کے ساتھ اس اہم معاہدے پر دستخط کئے ہیں۔ دوسری جانب سعودی عرب سمیت 4عرب ممالک نے امریکہ اور قطر کے درمیان دہشتگردی کی مالی امداد روکے جانے سے متعلق معاہدے کو ناکافی قرار دیتے ہوئے کہا ہے کہ قطر جب تک سعودی عرب سمیت دیگر عرب ممالک کے مطالبات تسلیم نہیں کرتا تب تک اس پر لگائی جانے والی پابندیاں عائد رہیں گی۔دریں اثنا امریکی و قطری وزرائے خارجہ کے درمیان قطر اور سعودی عرب سمیت دیگر عرب ممالک کے ساتھ جاری سفارتی بحران پرتبادلہ خیال بھی کیا گیا ہے۔امریکی وزیر خارجہ کا کہنا ہے کہ امریکا اس سفارتی بحران کو طے کرانے کے لیے کوشاں ہے اورہم چاہتے ہیں کہ یہ تنازعہ جلد ازجلد ختم ہوجائے، گذشتہ جمعرات کو اس کے وزیر دفاع جیمز میٹس نے قطری وزیر مملکت برائے دفاع خالد العطیہ سے ٹیلی فون پر گفتگو کی تھی اور ان سے کشیدگی کم کرنے کے حوالے سے تبادلہ خیال کیا تھا۔واضح رہے کہ قطر میں امریکی فضائیہ کا خطے میں سب سے بڑا اڈا ہے جبکہ سعودی عرب عشروں سے امریکا کا قریبی اتحادی ہے اور صدر ڈونلڈ ٹرمپ کے مئی میں سعودی عرب کے دورے کے موقع پر دونوں ملکوں کے درمیان 110 ارب ڈالرز مالیت کے دفاعی سودے طے پائے تھے۔