اسلام آباد(آئی این پی)مشیرخارجہ سرتاج عزیز نے بحرین کو سی پیک میں شمولیت کی دعوت دیتے ہوئے کہا ہے کہ بحرین کے سرمایہ کار سی پیک کے ثمرات سے مستفید ہوسکتے ہیں،پاکستان اور بحرین کے گذشتہ تین سال سے بہترین تعلقات ہیں،پاکستان اور بحرین کے رہنماؤں کے دوروں سے تعلقات مزید مضبوط ہوئے ہیں،آئندہ سال پاکستان بحرین تجارتی کانفرنس اسلام آباد میں منعقد ہوگی۔پیر کو
بحرین کے وزیرخارجہ شیخ خالد بن احمد کے ہمراہ نیوز کانفرنس کرتے ہوئے مشیرخارجہ سرتاج عزیز نے کہاکہ پاکستان اور بحرین کے گذشتہ تین سال سے بہترین تعلقات ہیں،دونوں ملکوں کے درمیان 1983سے اقتصادی تعلقات قائم ہیں،پاک بحرین مشترکہ بزنس کونسل کے جلد قیام پر اتفاق ہوا ہے،پاکستان اور بحرین کے رہنماؤں کے دوروں سے تعلقات مزید مضبوط ہوئے ہیں۔انہوں نے کہاکہ دونوں ملکوں کے درمیان مختلف شعبوں میں تعاون کے سمجھوتے موجود ہیں،پاکستان اور بحرین تعلیم کے شعبے میں بھی تعاون کر رہے ہیں،بحرین نے حال ہی میں پاکستان کو یونیورسٹی کا تحفہ دیا ہے۔مشیرخارجہ نے کہاکہ بحرین کے سرمایہ کار پاکستان میں توانائی کے شعبے میں سرمایہ کاری کریں،بحرین کو سی پیک میں شمولیت کی دعوت دیتے ہیں،آئندہ مالی سال پاکستان بحرین تجارتی کانفرنس اسلام آباد میں منعقد ہوگی،بحرین کے سرمایہ کار سی پیک کے ثمرات سے مستفید ہوسکتے ہیں۔انہوں نے کہاکہ دہشتگردی کے خلاف دونوں ملکوں نے اہم کردار ادا کیا ہے۔اس موقع پر بحرین کے وزیرخارجہ شیخ خالد بن احمد نے کہا کہ مشترکہ وزارتی کمیشن پر شعبے میں ایک دوسرے سے تعاون کرے گا،وزیراعظم نوازشریف اور مشیرخارجہ سے مثبت ملاقاتیں ہوئیں،مختلف شعبوں میں تعاون کیلئے
نئی راہیں تلاش کی جائیں،زراعت اور سفارتکاروں کی تربیت کے شعبوں میں مفاہمتی یاداشتوں پر دستخط کیے ہیں۔انہوں نے کہاکہ پاکستان اور بحرین کے بہترین تعلقات کیلئے پرعزم ہیں،پاکستان میں بہترین میزبانی پر مشکور ہیں۔
