برلن(مانیٹرنگ ڈیسک)مشکوک سرگرمیاں بھاری پڑ گئیں،ہزاروں افغان شہری ملک بدرکرنے کی تیاریاں،جرمنی نے 12ہزار سے زائد افغان شہریوں کو ملک بدر کرنے کی تیاری شروع کردی ۔جرمن میڈیا کے مطابق جرمن حکومت افغان شہریوں کی ایک بڑی تعداد کو ملک بدر کرنا چاہتی ہے۔ ایک اخباری رپورٹ کے مطابق برلن حکومت کی اس فہرست میں ساڑھے بارہ ہزار افغان شہریوں کے نام ہیں۔ برلن میں حکام کا موقف ہے کہ افغانستان کا زیادہ تر علاقہ اب محفوظ ہے۔
ذرائع کا کہنا ہے کہ جرمنی افغان مہاجرین کے جرائم میں ملوث ہونے کی وجہ سے بھی پریشان ہے اور اب اس نے سخت اقدامات اٹھانے کا فیصلہ کرلیا ہے تاہم سیاسی پناہ کے متلاشی افغان شہریوں کی ملک بدری جرمنی میں ایک متنازعہ معاملہ بن چکی ہے، کیونکہ ہندو کش کی اس ریاست میں طالبان کے خونریز حملوں کا سلسلہ ابھی رکا نہیں ہے۔ اس کی تازہ ترین مثال گزشتہ ہفتے مزار شریف میں جرمن قونصل خانے پر کیا جانے والا حملہ ہے۔
