کوئٹہ (این این آئی )ایران میں تعینات پاکستان کے سفیر آصف خان درانی نے کہا ہے کہ پاکستان اور ایران کے درمیان دیرینہ تعلقات قائم ہیں۔ امید ہے کہ دونوں برادر اسلامی ممالک کے درمیان تجارتی حجم میں جلد پانچ ارب ڈالر تک اضافہ ہوجائے گا، جو ہری معاہدے کے بعد ایران اور پاکستان کے تجارتی تعلقات میں موجود رکاوٹیں باالخصوص بینکنگ کے شعبے کو درپیش بعض مسائل کا بھی خاتمہ ہورہاہے ۔ یہ بات انہوں نے ایران کی قومی خبراساں ادارے کے ساتھ ایک خصوصی انٹر ویو میں کہی ۔ آصف خان درانی نے کہاہے کہ ایران اور گروپ 5+1کے درمیان طے پانے والے جو ہری معاہدے کے بعد پاکستان اور ایران کے دوطرفہ تعلقات بڑھانے کی راہ ہموار ہوگئی ہے اور اس کے علاوہ ایران مخالف پابندیوں کے خاتمے میں بھی تیزی آئی ہے ۔ انہوں نے کہاکہ ہم پاکستان میں ایرانی سرمایہ کاری کا خیر مقدم کرتے ہیں اور جوہری معاہدے کے بعد ایران اور پاکستان کے تجارتی تعلقات میں موجود رکاوٹیں با الخصوص بینکنگ کے شعبے کو درپیش بعض مسائل کا بھی خاتمہ ہورہاہے۔ پاکستانی سفیر نے کہاکہ ایران اور پاکستان کے مختلف شعبوں با الخصوص توانائی اور اقتصادی میدان میں مشترکہ تعاون کو بڑھانے پر عزم ہیں اور آئندہ چار سالوں کے دروان دوطرفہ تجارتی حجم کی سطح پانچ ارب ڈالر تک پہنچ جائیگی آصف خان درانی نے کہاکہ پاکستان اور ایران ایک دوسرے کے قریبی دوست اور برادر پڑوسی ممالک ہے جن کے تعلقات مضبوط شراکت داری پر مبنی ہے۔

موضوعات:ایرانی سفیر