احمد آباد(نیوزڈیسک) مودی حکومت سے سرجیکل سٹرائیک کے ثبوت مانگنے پر نئی دہلی کے وزیر اعلیٰ اروند کیجریوال ان دنوں نریندرمودی کی جماعت بی جے پی کی سخت تنقید کاسامناکررہے ہیں ۔بھارتی ٹی وی چینل این ڈی ٹی وی کی رپورٹ کے مطابق نئی دہلی کے وزیر اعلیٰ اروند کیجریوال نے آج بھارتی گجرات کا 4روزہ دورہ شروع کیا توان کے ریاست گجرات میں پہنچنے پرکیجریوال کی مخالفت میں جگہ جگہ تصویری پوسٹرز اور بینرز آویزاں نظرائے جن میں نئی دہلی کے وزیر اعلیٰ کی تصویر کے ساتھ القاعدہ کے سربراہ اسامہ بن لادن ،جماعت الداعوہ کے سربراہ حافظ محمد سعید اور مقبوضہ کشمیر میں قابض بھارتی فوج کے ہاتھوں شہید ہونے والے حزب المجاہدین کے کمانڈر برہان مظفر وانی کی تصاویربھی آویزاں تھیں ۔ان بینرزاورپوسٹروں کے بارے میں بھارتیہ جنتاپارٹی کے ترجمان نے موقف اپنایاکہ ریاست کے عوام میں کیجریوال کے حوالے سے شدید غم وغصہ پایا جاتا ہے ،گجرات سرحدی ریاست ہے ، یہ پوسٹرز حکومتی جماعت نہیں بلکہ گجرات کے عوام لگا رہے ہیں ۔انہوں نے کہا کہ جب کیجریوال پاکستانی سوشل میڈیا میں ہیرو بننے کے لئے سرجیکل سٹرائیک اور فوج کی توہین کریں گے تو گجرات کی عوام انہیں کبھی برداشت نہیں کریں گے ۔دوسری طرف ان پوسٹرز کے حوالے سے ریاست میں سیاسی بازار گرم ہو چکا ہے اور بہت سے لوگ اس سیاسی گرما گرمی کو قبل اَز وقت انتخابات کی دھمک کے طور پر دیکھ رہے ہیں ۔عام آدمی پارٹی گجرات کے انچارج گلاب سنگھ یادیو کاموقف تھاکہ ایسے پوسٹرز کا لگنا بی جے ہی کی بوکھلاہٹ کا منہ بولتا ثبوت ہے ،مودی حکومت جھوٹ بول کر اور بے بنیاد الزام تراشی کر کے اروند کیجریوال کی مقبولیت کو کم نہیں کر سکتی ۔انہوں نے کہاکہ پاکستان کے خلاف سرجیکل سڑائیکس کادعوی سراسرجھوٹ پرمبنی ہے اورمودی نے ہماری بہادرفوج کی توہین کی ہے ۔

موضوعات:مودی سرکار