لندن(مانیٹرنگ ڈیسک) پٹھان کوٹ میں بھارتی ایئربیس پرحملے کی حقیقت اوربھارتی جھوٹ کھل کرسامنے آگیا۔برطانوی ویب سائٹ کے مطابق ایک بھارتی فوجی نے انکشاف کیا ہے کہ ایئربیس پرحملہ توضرور ہوا تھا لیکن کوئی بھارتی فوجی زخمی یا ہلاک نہیں ہوا، جب حملہ ہوا تواس وقت کسی بھی بھارتی فوجی کے پاس کوئی ہتھیار موجود نہیں تھا۔ بھارتی فوجی نے انکشاف کیاکہ اسلحہ نہ ہونے کی وجہ سے حملہ ہوتے ہی ہم بھاگ نکلنے میں کامیاب ہوگئے اور کسی بھارتی فوجی کوگولی بھی نہیں لگی۔اسی طرح پاکستان میں سرجیکل سٹرائیک کا شوشہ مودی سرکار کے گلے پڑ گیا، بھارتی میڈیا کے ثبوت مانگنے پر وزیر داخلہ راج ناتھ سنگھ کی ”آئیں بائیں شائیں“، انتظار کرو اور دیکھو کا مشورہ دے کر جان چھڑائی۔ بھارتی میڈیا کی رپورٹ کے مطابق گزشتہ روز نئی دہلی میں سمارٹ ٹوائلٹ کی تعمیر کے حوالے سے افتتاحی تقریب میں وزیر داخلہ راج ناتھ سنگھ سے صحافیوں نے سوال کیا کہ بھارت نے سرجیکل سٹرائیک کے حوالے سے ابھی تک ویڈیو فوٹیج کیوں نہیں جاری کی حالانکہ اس کارروائی پر شکوک و شبہات کا اظہار کیا جارہا ہے تو راج ناتھ سنگھ لاجواب ہوگئے اور کچھ سوچنے کے بعد سوال گندم جواب چنا کے مصداق کہنے لگے کہ پوری دنیا اس سرجیکل سٹرائیک کے بارے میں جانتی ہے ہمارے جوانوں نے بہادری کا مظاہرہ کیا اور بھارت کا سرفخر سے بلند کردیا تاہم صحافیوں کی طرف سے سوال دہرائے جانے پر جب راج ناتھ سنگھ کو جان چھڑانے کا کوئی چارہ نظر نہ آیا تو انہوں نے میڈیا کو انتظار کرو اور دیکھو کا مشورہ دے دیا۔ واضح رہے کہ بھارت نے پاکستان میں سرجیکل سٹرائیک کا دعویٰ توکردیا ہے لیکن وہ اس حوالے سے تاحال کوئی ثبوت پیش کرنے میں ناکام ہے جس کے باعث اسے ہزیمت کاسامنا کرنا پڑ رہا ہے۔

موضوعات:بھارتی فوجی پٹھانکوٹ