اسلام آباد(آن لائن)بھارتی وزیر دفاع منوہر پاریکر نے اڑی سیکٹر حملہ کے واقعہ پر ناقص سیکیورٹی کا اعتراف کر تے ہوئے کہاہے کہ آئندہ اس بات کویقینی بنایا جائے گا کہ ایسی کسی غلطی کو نہ دہرایاجائے۔ بدھ کو بھارتی خبررساں ادارے کے مطابق ایک تقریب سے خطاب کرتے ہوئیبھارتی وزیر دفاع نے اڑی سیکٹر حملہ کے واقعہ پر ناقص سیکیورٹی کا اعتراف کیا ہے اور کہا ہے کہ آئندہ ایسی کوئی غلطی نہیں ہو گی۔ منوہر پاریکر نے کہا کہ مبینہ طور پر عسکریت پسندوں کے حملے ا ور جذباتی انداز میں بھی جواب دیا جا سکتا ہے تاہم بھارت ایک ذمہ دار طاقت ہے لیکن اس کا مطلب ہرگز یہ نہیں کہ ہم دہشت گردوں کے ملک میں داخلے پر آنکھیں بند کر کے بیٹھ جائیں۔ انہوں نے کہا کہ ایسے وقت میں مضبوط کارروائیوں کی ضرورت ہے۔حملے پر کیا سزا دینی ہے ہم اس پر کام کر رہے ہیں لیکن ہم اس معاملے پر مکمل سنجیدہ ہیں جبکہ پاکستان کے جوابی جوہری حملے بارے سوال کے جواب میں بھارتی و زیر دفاع نے بڑھک مارتے ہوئے محاورتاًجواب دیا کہ تھوتھا چنا باجے گھنا’’ خالی برتن زیادہ شور مچاتا ہے‘‘ مضبوط آدمی زیادہ دلائل نہیں دیتا یاخاموش رہتاہے۔ کہاکہ یہ بات اس کے مترادف ہے۔ منوہر نے کہا کہ وہ صفر غلطی پر یقین رکھتے ہیں اور بھارت اب اس بات کو یقینی بنائے گا کہ ایسی غلطی دوبارہ نہ ہو۔واضح رہے کہ بھارتی سورماؤں نے اڑی حملہ ہوتے ہی پاکستان پر الزامات کی بوچھاڑ کر دی تھی۔ اب صورتحال واضح ہونے پر کھسیانی بلی نے ایک بار پھر کھمبا نوچنا شروع کر دیا ہے۔ دوسری جانب بھارتی وزیر دفاع کے اعتراف سے بھارت میں ہلچل مچ گئی ہے۔

موضوعات:اڑی حملہ پاک بھارت کشیدگی