لندن(آئی این پی )برطانیہ میں ایک تازہ عوامی جائزے میں بتایا گیا ہے کہ 43 فیصد برطانوی عوام ملک کا یورپی یونین سے انخلا چاہتے ہیں۔ اس کے مقابلے میں یورپی یونین میں رہنے والے افراد کی تعداد 42 فیصد ہے۔ یْو گوو نامی سروے کے مطابق 23 جون کو ہونے والے ریفرنڈم میں یورپی یونین سے اخراج کے حق میں رائے بڑھتی جا رہی ہے۔ سنڈے ٹائمز میں شائع ہونے والے اس جائزے کے مطابق برطانوی عوام اقتصادیات، سیاست، دفاع اور سفارت کاری میں اپنے ملک کو یورپی یونین سے بالکل الگ دیکھنا چاہتے ہیں۔ اتوار ہی کے روز سامنے آنے والے ایک اور سروے میں یورپی یونین میں رہنے والے افراد کی تعداد اپنے مخالفین کے مقابلے میں ایک فیصد زیادہ رہی۔