بیجنگ (این این آئی)چین کی پیپلز ریپبلک آرمی کے ایڈمرل سن جیانگ یو نے امریکی وزیر دفاع کے بیان کو مسترد کر تے ہوئے کہا ہے کہ چین کو تنہا نہیں کیا جاسکتا۔ایڈمرل سن جیانگ یو نے کہا کہ وہ ماضی میں بھی تنہا نہیں تھے ، اب بھی تنہا نہیں ہیں اور نا ہی مستقبل میں ہمیں تنہا کیا جا سکتا ہے۔سن جیانگیو نے اس خطے میں بحری کشیدگی کا الزام امریکہ پر عائد کیا۔ انہوں نے خطے کے ممالک کیلئے امریکی حمایت کو تنقید کا نشانہ بنایا انھوں نے کہا کہ وہ ممالک جوسرد جنگ والی ذہنیت برقرار رکھے ہوئے ہیں اور ان تنازعات سے ان کا کوئی براہ راست تعلق نہیں ہے انہیں اپنے ذاتی مفادات کے لیے سبوتاژکرنے والے عمل میں ملوث ہونے کی اجازت نہیں ہونی چاہیے۔ واضح رہے کہ امریکی وزیر دفاع ایش کارٹر نے سنگاپور میں سلامتی کی بین الاقوامی کانفرنس میں وزرائے دفاع اور سلامتی کے امور کے مبصرین کو مخاطب کرتے ہوئے کہا تھا کہ چین کی اس اسٹریٹیجک اہمیت کی سمندری حدود اور اس سے باہر چین کی کارروائیوں سے متعلق تشویش بڑھتی جا رہی ہے۔