کابل(این این آئی) افغان شہر قندوز میں نامعلوم مسلح افراد نے مختلف بسوں سے سفر کرنے والے 16 افراد کو قتل اور درجنوں کو یرغمال بنالیا ۔غیر ملکی میڈیا کے مطابق افغان حکام نے دعویٰ کیا کہ طالبان نے قندوز کے قریب ضلع علی آباد میں اپنی خود ساختہ چیک پوسٹ پر کابل سے بدخشاں جانے والی 4 مسافر بسوں کو روک کر اس میں سوار 230 سے زائد افراد کو یرغمال بنالیا۔ مسلح افراد نے مسافروں کے شناختی دستاویزات کی جانچ پڑتال کے بعد 46 افراد کو یرغمال بنا کر باقی تمام کو رہا کرکے انہیں آگے سفر کی اجازت دے دی۔ واقعہ کے کچھ ہی دیر بعد یرغمال بنائے گئے افراد میں سے 16 کو قتل کردیا ٗ دیگر تاحال ان کی تحویل میں ہیں۔قندوز پولیس کے نائب سربراہ معصوم ہاشمی کا کہنا ہے کہ قندوز کے پولیس کمانڈر شیر عزیز کماول نے واقعے کی تصدیق کرتے ہوئے کہا ہے کہ مغویوں کی شناخت تاحال نہیں ہوسکی تاہم اغوا کئے گئے مسافروں میں سے 9 سے افغان فورسز کی وردی پہن رکھی تھی جب کہ دیگر پولیس کے سابق اہلکار ہوسکتے ہیں۔