نیویارک (آئی این پی ) یوں تو دنیا کے بیشتر ممالک کے سربراہان کیلئے ماہر شیفس کی خدمات حاصل کی جاتی ہیں جو انواع و اقسام کے مزے مزے کے پکوان تیار کرتے ہیں لیکن ان دنوں ایک بادشاہ نے شیف بن کر سوشل میڈیا پر دھوم مچائی ہوئی ہے۔ بھوٹان کے بادشاہ وینگ چک کی پیاز اور دیگر سبزیاں کاٹنے کی تصاویر ان دنوں سوشل میڈیا پر لوگوں کی توجہ کا مرکز بنی ہوئی ہیں جس میں وہ اسکول کے بچوں کیلئے کھانا تیار کرنے کی غرض سے سبزیاں کاٹ رہے ہیں۔سوشل میڈیا پر جگمی وینگ چک کے اس اقدام کو کافی سراہا جارہا ہے۔ واضح رہے کہ اس سے قبل بھی بھوٹان کے بادشاہ نے اپنے بیٹے کی سالگرہ کے موقع پر ایک لاکھ درخت لگا کر لوگوں کی توجہ حاصل کی تھی۔