کابل(این این آئی ) افغانستان کے جنوبی صوبے ہلمند میں پولیس ٹریننگ سینٹر کے باہر خود کش دھماکے میں 4 افراد ہلاک اور 10 زخمی ہوگئے ٗزخمیوں میں بعض کی حالت نازک ہے جس کے باعث ہلاکتوں میں اضافے کا خدشہ ہے ۔ غیر ملکی میڈیا کے مطابق ہلمند صوبے کے گورنر کے ترجمان عمر زواک نے تصدیق کی کہ حملہ خود کش تھا۔عمر زواک کے مطابق خود کش نے صبح 9 بجے ٹریننگ سینٹر کے باہر خود کو دھماکے سے اڑایا۔صوبائی گورنر کے ترجمان نے ہلاکتوں یا زخمی افراد کی تعداد کے حوالے سے آگاہ نہیں کیا۔سیکیورٹی ذرائع سے سامنے آنے والی معلومات کے مطابق حملے 4 افراد ہلاک ہوئے ٗ دھماکے کی شدت سے زد میں آنے والے 10 زخمیوں کو مقامی ہسپتالوں میں منتقل کیا گیا ٗسرکاری ہسپتالوں کے عملے نے بھی 10 زخمیوں کو طبی امداد کے لیے لائے جانے کی تصدیق کی۔طالبان کی جانب سے اس حملے کی ذمہ داری قبول کی گئی ہے۔افغان طالبان کی جانب سے مقامی میڈیا کو جاری کیے گئے بیان میں کہا گیا ہے کہ حملہ گاڑی میں بارودی مواد بھر کر کیا گیا۔