نیویارک(نیوز ڈیسک) امریکی ایوان نمائندگان نے ملک میں بغیر ویزے کے داخلے کا عمل سخت بنانے کے حق میں ووٹ دیا ہے۔اس بل کی سینیٹ سے منظوری کی صورت میں نئے اقدامات کے تحت اب ایسے افراد کو بغیر ویزے کے امریکہ میں داخلے کی اجازت نہیں ہوگی جنھوں نے مارچ 2011 کے بعد عراق اور شام کا سفر کیا ہو۔ اس کے علاوہ ایسے افراد جنھوں نے ایران اور سوڈان کا سفر کیا ہو، انھیں بھی ویزے کی ضرورت ہوگی۔امریکہ کے ویزا ویور پروگرام کے تحت تین درجن سے زیادہ ممالک ایسے ہیں جن کے شہریوں کو امریکہ آمد کے لیے ویزے کی ضرورت نہیں ہوتی۔ویزے کے بغیر امریکہ سفر کرنے کی سہولت میں مجوزہ تبدیلی کے حق میں ایوان نمائندگان نے 19 کے مقابلے 407 ووٹ دیے۔وائٹ ہاوس کے حمایت یافتہ اس بل کو اس خیال کے تحت پیش کیا گیا ہے کہ جن افراد نے پیرس میں حملے کیے وہ بغیر ویزے کے امریکہ میں داخل ہو سکتے تھے۔اس بل کے پیش کرنے والوں میں پیش پیش ریپبلکن رہنما کینڈس میلر نے کہا انتہائی احتیاط کے تحت اب ان افراد کو ویزے کے لیے درخواست دینی ہوگی اور انھیں ویزا کی سکریننگ کے مرحلے سے گزرنا ہوگا۔