اسلام آبا د(نیوزڈیسک) پاکستان کے دفتر خارجہ نے بتایا ہے کہ سعودی عرب کی جیلوں میں 2308 پاکستانی قید ہیں۔ ریڈیو پاکستان نے دفتر خارجہ کے ترجمان سید قاضی خلیل اللہ کے حوالے سے بتایا کہ سعودی عرب کے مختلف حراستی مراکز میں 2300 سے زائد پاکستانی جلا وطنی کے منتظر ہیں۔ قاضی خلیل اللہ کے مطابق، یہ پاکستانی حج اور عمرہ ویزوں کی خلاف ورزیوں میں ملوث ہیں۔ جمعرات کو یہاں ہفتہ وار پریس بریفنگ کے دوران ایک سوال کے جواب میں قاضی خلیل اللہ نے بتایا پاکستان مسئلہ کشمیر سمیت تمام دیرینہ تنازعات کے حل اور دوطرفہ تعلقات کے فروغ کیلئے ہندوستان کے ساتھ نتیجہ خیز مذاکرات کا خواہاں ہے۔ ’ہم اس بات کے منتظر ہیں کہ وزیراعظم نواز شریف اور ان کے بھارتی ہم منصب نریندرامودی کی پیرس میں ملاقات کے بعد کیسے پیش رفت ہو‘۔ دفتر خارجہ کے ترجمان نے بتایا کہ ہارٹ آف ایشیاءکی دو روزہ کانفرنس منگل سے اسلام آباد میں شروع ہوگی۔ انہوں نے کہا کہ پروگرام کے مطابق وزیراعظم نواز شریف اور افغانستان کے صدر اشرف غنی کانفرنس کا افتتاح کریں گے۔ ایک سوال پر ترجمان نے کہا کہ دولت اسلامیہ ایک دہشت گرد تنظیم ہے اور اس کا پاکستان میں کوئی وجود نہیں۔ انہوں نے کہا کہ پاکستان ملک سے دہشت گردی کے مکمل خاتمے کے لئے پرعزم ہے اور اس سلسلے میں آپریشن ضرب عضب کامیابی سے جاری ہے۔ افغانستان میں ہندوستانی سفیر کے بیان کے حوالے سے ایک سوال پر ترجمان نے کہا کہ کسی سفیر کی طرف سے اپنے میزبان ملک کے کسی تیسرے ملک کے ساتھ تعلقات نقصان پہنچانے کی کوششیں سفارتی آداب کے خلاف ہے۔ انہوں نے توقع ظاہر کی کہ تمام علاقائی ممالک افغانستان میں امن اور مفاہمت کی کوششوں کی حمایت کریں گے۔