کیلیفورنیا(نیوزڈیسک) امریکی صدر براک اوباما کو کھانے اورتقریبات میں شرکت کا تو شوق ہے ہی لیکن اتنا شوق کہ گولف کھیلتے کھیلتے شادی کی تقریب میں جا پہنچے اور مہمانوں کے کے ساتھ گھل مل گئے جب کہ مہمان اس بن بلائے اہم مہمان کو دیکھ کر حیران رہ گئے۔امریکی میڈیا رپورٹ کے مطابق کیلیفورینا کے ٹوری پئنس گولف کورس میں برائن اور اسٹیفینی کی شادی کی تقریب چل رہی تھی اور دونوں اس محفل میں اپنے مہمانوں کے ساتھ خوش گپیوں میں مصروف تھے کہ اسی دوران امریکی صدر براک اوباما بھی اپنے دورے کے دوران یہاں گولف کھیلنے پہنچ گئے۔ اسی دوران اعلان کیا گیا کہ صدر یہاں پہنچنے والے ہیں لیکن اس اعلان نے سب ہی کو حیران کردیا تاہم امریکی صدر کے لیے تقریب کچھ دیر کے لیے مؤخر کردی گئی جس کے کچھ ہی دیر بعد امریکی صدر تقریب میں پہنچ گئے جس کے بعد وہاں موجود فوٹو گرافر کے لیے یاد گار تصاویر بنانے کا بہترین موقع تھا۔ دْلہا اور دْلہن کا کہنا تھا کہ وہ امریکی صدر کو اپنے درمیان پاکر بہت خوش ہوئے اور ان کی شادی کے یہ لمحات یاد گار بن گئے۔امریکی صدر براک اوباما نے اس جوڑے کے ساتھ کئی تصاویر بنوائیں جب کہ جوڑے کا کہنا تھا کہ امریکی صدر انتہائی مہربان اور رحم دل انسان ہیں اور ان کے ساتھ گزرے یہ لمحے ہمیشہ یاد رہیں گے۔