دبئی سٹی (نیوز ڈیسک) گزشتہ ہفتے دنیا کے متعدد ممالک کی طرح متحدہ عرب امارات میں بھی واٹس ایپ کالنگ فیچر کی فراہمی کا آغاز کیا گیا لیکن اس پیشکش کے منظر عام پر آنے کے چند گھنٹے بعد ہی صارفین کے لئے اس کے استعمال میں مشکلات پیش آنے لگیں، اور اب ان مشکلات کی وجوہات بھی سامنے آگئی ہیں۔

نیوز ویب سائٹ emirates247 نے انکشاف کیا ہے کہ متحدہ عرب امارات کی ٹیلی کام کمپنیوں نے واٹس ایپ کالنگ سروس کی فراہمی میں رکاوٹیں پیدا کرنا شروع کردی ہیں کیونکہ وائس اوور آئی پی (VoIP) کی سروس فراہم کرنے کا حق صرف لائسنس یافتہ کمپنیوں، مثلاً ایتصلات اور Du کے پاس ہیں۔ نیوز ویب سائٹ نے ایتصلات کے ذرائع کے حوالے سے بتایا ہے کہ کمپنی نے موبائل فون نیٹ ورکس پر واٹس ایپ کالز کو بلاک کرنا شروع کردیا ہے کیونکہ یہ سروس کمپنی کے حقوق کے خلاف ہے۔
تاحال کچھ صارفین واٹس ایپ کالنگ فیچر سے استفادہ کرنے میں کامیاب ہورہے ہیں لیکن خدشہ ظاہر کیا گیا ہے کہ آنے والے چند دنوں کے دوران یہ سروس پورے ملک میں بلاک کردی جائے گی۔ یہ اندازہ بھی ظاہر کیا گیا ہے جو صارفین اس سروس کو پہلے ہی ایکٹیویٹ کرچکے ہیں وہ اسے وائی فائی نیٹ ورکس کے ذریعے استعمال کرنا جاری رکھ سکیں گے اگرچہ اس کی کوالٹی بڑی حد تک متاثر ہوسکتی ہے۔