اسلام آباد(نیوز ڈیسک)افریقی ملک نائجیریا کے شدت پسند گروپ بوکوحرام نے شدت پسند تنظیم دولتِ اسلامیہ عراق و شام (داعش) کے ساتھ وفاداری کا اعلان کیا ہے۔ سماجی رابطے کی ویب سائٹ ٹویٹر پر بوکو حرام کے سربراہ ابوبکر شیخاو¿ کی جانب سے جاری کئے جانے والے ایک پیغام میں یہ اعلان کیا گیا ہے۔ گزشتہ برس ایک ویڈیو پیغام میں ابوبکر شیخاو¿ نے داعش کے سربراہ ابوبکر البغدادی کو ”خلیفہ” کہہ کر مخاطب کیا تھا۔ واضع رہے کہ شدت پسند تنظیم بوکو حرام کی ابتدائمحمد یوسف نامی سکالر نے رکھی تھی جو 2009ءمیں مارے گئے تھے۔ اس کے بعد اس گروپ کے کئی دھڑے ہو گئے۔ سب سے مضبوط دھڑا ابوبکر شیخاو¿ کا ہے۔ یہ تنظیم مغربی طرز تعلیم کو حرام سمجھتی ہے اس لئے اس کا نام بوکو حرام پڑ گیا اور اسی نام سے یہ مشہور ہے۔ اس تنظیم نے 2009ء سے نائجیریا کیخلاف بغاوت شروع کر رکھی ہے۔ بوکوحرام کی بغاوت شروع ہونے کے بعد سے اب تک ہزاروں لوگ مارے جا چکے ہیں۔ شیخاو¿ کی قیادت میں بوکو حرام نے بم دھماکوں اور اغواءکی وارداتوں کا سلسلہ شروع کر رکھا ہے۔ اس دوران کئی غیر ملکی بھی اغواء کئے گئے ہیں۔ 2014ء میں شمالی نائجیریا کے ایک سکول سے تین سو طالبات کو اغواء کیا گیا تھا۔ اقوام متحدہ نے گزشتہ سال بوکو حرام تنظیم پر پابندیاں عائد کی تھیں۔ برطانوی نشریاتی ادارے کے مطابق بوکو حرام کی جانب سے دولتِ اسلامیہ سے وفاداری کے عزم پر مبنی اس پیغام کی فوری طور پر تصدیق نہیں ہو سکی ہے۔