اسلام آباد (نیوزڈ یسک) تائیوان میں ایک غیر معمولی واقعہ سامنے آیا ہے جہاں 102 سالہ امیر شخص نے چپکے سے شادی کرلی، مگر راز کھلتے ہی اسپتال میں ہنگامہ برپا ہوگیا۔
میڈیا رپورٹس کے مطابق دارالحکومت تائی پے کے اس بزرگ کروڑ پتی نے 68 سالہ خاتون سے خفیہ نکاح کیا اور اس بات کو اپنے اہلِ خانہ سے پوشیدہ رکھا۔ معاملہ اس وقت منظرِ عام پر آیا جب وہ اپنی نئی اہلیہ کے ساتھ اسپتال سے باہر نکل رہے تھے اور اتفاقاً اسی وقت ان کے بیٹے، بہوئیں اور پوتے پوتیاں وہاں پہنچ گئے۔ منظر دیکھتے ہی اہلِ خانہ حیرت میں پڑ گئے اور پھر شدید غصے کا اظہار کرنے لگے۔صورتحال اس لیے بھی کشیدہ ہوگئی کہ مذکورہ خاتون دراصل وہی نگراں تھیں جنہیں بچوں نے اپنے والد کی دیکھ بھال کے لیے ملازم رکھا تھا۔ مشتعل بیٹوں نے خاتون کو ایک طرف دھکیل دیا اور والد کی وہیل چیئر سنبھال کر انہیں اپنے ساتھ لے جانے کی کوشش کی، جس پر خاتون نے شور مچایا اور پولیس کو بلا لیا۔ اس دوران دونوں فریقوں کے درمیان جھگڑا اور ہاتھا پائی بھی ہوئی۔پولیس کے پہنچنے پر بیٹوں نے مؤقف اختیار کیا کہ خاتون نے ان کے والد کی ذہنی کمزوری کا فائدہ اٹھاتے ہوئے دولت کے لالچ میں شادی کی ہے۔
ان کا کہنا تھا کہ نکاح کے بعد بزرگ نے سات جائیدادیں اور تقریباً 19 لاکھ پاؤنڈ مالیت کی انشورنس پالیسی خاتون اور اس کے بچوں کے نام منتقل کردی۔دوسری جانب رجسٹریشن حکام کا کہنا ہے کہ شادی کے اندراج کے وقت بزرگ نے تمام سوالات کے درست جواب دیے اور قانونی شرائط پوری کیں۔ تاہم اب اہلِ خانہ کی جانب سے مقدمہ دائر کیے جانے کے بعد عدالت ہی اس نکاح کی حیثیت اور اثاثوں کی منتقلی کے معاملے کا حتمی فیصلہ کرے گی۔
