اسلام آباد(مانیٹرنگ ڈیسک)امریکہ کی 27 سالہ  لڑکی کیسی ڈی پیپول دنیا کی وہ  پہلی خاتون ہیں جنہوں نے دنیا کے ہر ملک کی سیر کا اعزاز اپنے نام کیا ہے۔ کیسی  ڈی پیپول  نے یہ ریکارڈ رواں سال فروری 2017ءمیں اس وقت بنایا جب وہ 27 سال کی  تھی ۔انہوں نے 196 ممالک کی سیر محض 18 مہینے اور 26 دن میں مکمل کی اس طرح وہ پوری دنیا کی سیر کرنے والی  پہلی خاتون بن گئیں۔عالمی میڈیا کی رپورٹس کے مطابق کیسی نے اس

سفر کے دوران 255 بار فضائی سفر کیا، 50 سے زائد ممالک میں اپنے نام کا درخت لگایا اور ہر ملک میں اوسطاً تین دن گزارے۔ انہوں نے یہ اعزاز حاصل کرنے کے بعد پہلی بار دنیا بھر کے ممالک میں سے ان چند ممالک کے نام بتائے ہیں جو انہیں سب سے زیادہ پسند آئے اور آپ کو یہ جان کر بے حد خوشی ہوگی کہ انہوں نے اس فہرست میں  پاکستان کا نام  بھی شامل کیا۔ کیسی نے ایک حالیہ انٹرویو کے دوران  بتایا کہ منگولیا انہیں بلند پہاڑوں اور فطری حسن سے مالا مال وادیوں کی وجہ سے بہت پسند آیا، بھوٹان کے تاریخی مذہبی مقامات پسند آئے، مالدیپ کے نیلے سمندروں نے انہیں متاثر کیا،جب پاکستان کا ذکر آیا تو کہنے لگیں کہ اس ملک میں ہر کسی کو ضرور جانا چاہیے کیونکہ یہ دنیا کا واحد ملک ہے جہاں آپ ایشیاءکے حقیقی کلچر کا سچا اور کھرا تجربہ کرسکتے ہیں،کیسی نے اپنے انٹرویو کے دوران پاکستان کے کھانوں کی بھرپور تعریف کی اورکہا کہ پاکستان کے کھانوں کا  تو پوری دنیا میں جواب نہیں۔ کیسی نے انٹرویو کے دوران اس بات کا انکشاف کیا کہ انہیں پاکستان کے ویزے کے حصول کے لئے 4 ماہ کا انتظار کرنا پڑا لیکن انہوں نے ہمت نہیں ہاری اور وہ ایک دن پاکستان کا ویزہ حاصل کرنے میں کامیاب ہوگئیں ،کیسی نے پورے دنیا کے لوگوں ،خصوصاً انہیں جو سیر و سیاحت کو شوق رکھتے ہیں انہیں پاکستان ضرور جانے کا مشورہ دیا۔یہ انٹرویو سوشل میڈیا پر بہت تیزی سے وائرل ہو رہا ہے ،صارفین کی جانب سے کہا جارہا ہے کہ کیسی کے آمد اور بعد ازاں اپنا تجربہ شیئر کرنے پر یقیناً پاکستان کا مثبت امیج دنیا بھر میں جائیگا۔