اسلام آبادا (مانیٹرنگ ڈیسک)دنیا کے کسی بھی ملک کے پاس کوئی معمولی سی دلچسپی کی چیز بھی ہو تو وہ ساری دنیا میں اس کا ڈھنڈورا پیٹتا ہے لیکن افسوس کہ ہمارے ملک میں دنیا کے پراسرار ترین عجوبے ہونے کے باوجود خود ہمیں ان کی خبر نہیں۔
بلوچستان کے شہر لسبیلا کے قریب واقع ’’گوندرانی کی غاریں‘‘ بھی ایک ایسی ہی حیرت انگیز چیز ہیں جنہیں دیکھنے والا بھول ہی جاتا ہے کہ وہ کس دنیا میں ہے۔ ان غاروں کو شہر روغن، بدروحوں کا شہر، مائی گوندرانی کا شہر اور پرانے گھر کے نام سے بھی یاد کیا جاتا ہے۔ گوندرانی ایک بہت بڑی قدیم اور پراسرار غار ہے جس میں قدیم دور کی کسی تہذیب کے آثار آج بھی باقی ہیں۔ اس بڑے غار کے اندر بے شمار چھوٹے غار نما کمرے ہیں۔ ان میں سے کچھ کے سامنے برآمدے بھی بنے ہوئے ہیں جبکہ کچھ جگہوں پر باورچی خانے کے آثار بھی ملتے ہیں۔ کراچی شہر سے یہ غاریں تقریباً 175 کلومیٹر کے فاصلے پر واقع ہیں۔ اگرچہ ان غاروں کے متعلق مصدقہ حقائق تو معلوم نہیں۔ کچھ تاریخ دانوں کا خیال ہے کہ یہ غاریں ساتویں صدی میں آباد ہوئیں اور یہاں اس وقت کی بدھ سلطنت کی عبادت گاہیں تھیں۔ تاریخ دان آندرے ونگ کے مطابق یہ بدھ مت کا مرکزی مندر تھیں۔ مقامی لوگوں نے حکومت سے درخواست کی ہے کہ اس تاریخی اثاثے کی مناسب دیکھ بھال کر کے اسے عالمی سیاحت کا مرکز بنایا جائے۔
