نئی دہلی(این این آئی)بھارت کی ریاست اترپردیش کے شہر میرٹھ کے ایک نجی سکول کی انتظامیہ نے طلبہ کے انڈے یا گوشت سے بنی کوئی بھی ڈش لانے پر پابندی لگا دی ۔میڈیارپورٹس کے مطابق رشبھ اکیڈمی کی انتظامیہ کی جانب سے طالب علموں سے کہا گیا ہے کہ

وہ صرف سبزیوں والا کھانا لائیں اور اگر انھوں نے ایسا نہ کیا نہ صرف انھیں سکول سے نکال دیا جائیگا بلکہ قانونی کاروائی بھی کی جائیگی۔سکول کی انتظامیہ نے تمام طالب علموں کو ریاست کے وزیر اعلی یوگی آدتیہ ناتھ کے جیسے انداز میں بال منڈوانے کا حکم بھی دیا گیا۔والدین کی جانب سے ان نوٹسز پر اعتراض کے بعد ضلعی مجسٹریٹ سمیر ورما نے ضلعی سکول انسپکٹر سے معاملے کی رپورٹ طلب کی ہے۔اس سکول میں پہلی سے 12 ویں جماعت میں تقریبا 2800 بچے پڑھ رہے ہیں۔سکول میں پڑھنے والے اقلیتی بچوں اور ان کے والدین نے الزام لگایا کہ انتظامیہ خاص طبقے کے بچوں کو نشانہ بناتے ہوئے داخلہ نہیں دینا چاہتی اور اسی وجہ سے پابندی کے ایسے ہتھکنڈے اپنائے جا رہے ہیں۔انتظامی کمیٹی کے سیکرٹری رنجیت جین نے کہاکہ بال اور نان ویج کھانے پر پابندی لگانے کے فیصلے کے بعد طالب علم ہمیں دھمکیاں دے رہے ہیں جس کی شکایت ہم ضلع مجسٹریٹ اور ایس ایس پی سے بھی کریں گے۔ طالب علموں کی حرکتیں سی سی ٹی وی کیمرے میں قید ہیں اور ان کے خلاف کارروائی کی جائے گی۔

موضوعات:انڈہ