کوالالمپور(این این آئی)سانپ پالنے والے ملیشیا کے فائرمین کا کہنا ہے کہ وہ اپنے پالتو سانپ کے ساتھ شادی کی جھوٹی خبروں پر بہت افسردہ ہیں۔ابو زرین حسین اپنی ریاست کے دیگر فائر فائٹرز کو بھی سانپ پکڑنے کے بارے میں تربیت دیتے ہیں۔میڈیارپورٹس کے مطابق رواں ماہ کے آغاز میں برطانیہ میں سنسنی پھیلانے والے ایک اخبار نے کہا تھا کہ ملیشیا کے فائرمین نے سانپ سے شادی کر لی ہے اور وہ اْسے اپنی ‘محبوبہ کا دوسرا جنم’ سمجھتے ہیں۔ حسین نے بتایا کہ کچھ افراد نے فیس بک سے اْن کی تصاویر اْٹھائی ہیں اور وہ ان اطلاعات پر بہت زیادہ ‘مایوس’ ہوئے ہیں۔انھوں نے کہا کہ ‘میں ہمیشہ سانپوں کے ساتھ کام کرتا ہوں اور دوسرے فائر مینز کو بھی سانپ پکڑنے اور مارنے سے بچانے کی تربیت دیتا ہوں۔‘انھوں نے بتایا کہ وہ شادی شدہ ہیں اور اْن کی بیوی ان خبروں کو سننے کے بعد’ٹھیک’ ہیں کیونکہ وہ جانتی ہیں کہ یہ’جھوٹی خبریں’ ہیں۔ حسین نے کہا کہ یہ تصاویر میرے لیے تھیں۔ انھوں نے میری تصاویر استعمال کر کے یہ خبر بنا لی کہ میں نے سانپ سے شادی کی ہے۔ حسین نے کہا کہ اس وقت بھی اْن کے پاس چار سانپ ہیں اور اْن کا پیشہ ہی سانپوں کی پرورش کر کے اْن کا مزاج سمجھنا ہے۔

موضوعات:سانپ