مدنا پور(نیوزڈیسک) بھارتی میڈیا کے مطابق بھارت کی ریاست مغربی بنگال کے شہر مدناپور میں ایک طالب علم سومیا دیپ نے انڈسٹریل ٹریننگ انسٹی ٹیوٹ میں داخلہ ٹیسٹ کے لئے جب اپنی رول نمبر سلپ ادارے کی ویب سائٹ سے ڈاؤن لوڈ کی تو وہاں اس کی تصویر کی جگہ ایک کتے کی تصویر موجود تھی ۔ رول نمبر سلپ کے ساتھ اس کے گھر کا پتا اور اس کے مکمل کوائف بھی درج تھے۔ طالب علم نے فوری طور پر متعلقہ ادارے سے فون پر رابطہ کیا اور اپنی شکایت درج کرائی تاکہ اسے دوران امتحان کسی قسم کی مشکلات کا سامنا نہ کرنا پڑے۔ تاہم پرچہ لیک آؤٹ ہونے کی وجہ سے منسوخ کر دیا گیا جس کے بعد الٹا پولیس نے طالب علم کو حراست میں لے کر اس سے تفتیش شروع کر دی ۔ ٹیکنیکل اینڈ ٹریننگ ایجوکیشن کے وزیر اجل بسواس کا کہنا ہے کہ طالب علم سے تفتیش کی جا رہی ہے تاکہ اصل حقائق کے بارے میں پتہ چل سکے۔ ان کا مزید کہنا تھا طلبا خود اپنے ہاتھوں سے فارم بھرتے ہیں اور اس میں تصویر بھی خود ہی چسپاں کرتے ہیں اگر اس حرکت میں طالب علم ملوث پایا گیا تو اسے گرفتار کر کے قانون کے مطابق سزا دی جائے گی