اسلام آباد (نیوز ڈیسک)وفاقی وزارتِ صحت اور نادرا کے درمیان ایک اہم معاہدے پر دستخط کیے گئے ہیں،
جس کا مقصد وزیراعظم ہیپاٹائٹس سی پروگرام کے ڈیجیٹل نظام کو مزید مؤثر اور مضبوط بنانا ہے۔اس سلسلے میں نادرا ہیڈکوارٹر میں ایک تقریب منعقد ہوئی، جس میں وفاقی وزیر صحت مصطفیٰ کمال اور نادرا کے چیئرمین لیفٹیننٹ جنرل محمد منیر افسر نے شرکت کی اور مفاہمت کی یادداشت (ایم او یو) پر دستخط کیے۔تقریب سے خطاب کرتے ہوئے مصطفیٰ کمال نے کہا کہ نادرا وزارتِ صحت کے لیے جدید ڈیجیٹل ڈیٹا مینجمنٹ سسٹم تشکیل دے گا، جس کے ذریعے مریضوں کی رجسٹریشن، تصدیق اور نگرانی کا عمل ریئل ٹائم ڈیٹا شیئرنگ کے تحت انجام دیا جائے گا۔
انہوں نے بتایا کہ وزیراعظم ہیپاٹائٹس سی پروگرام حکومت کا ایک اہم قومی منصوبہ ہے، جبکہ پاکستان میں تقریباً ایک کروڑ افراد اس مرض کا شکار ہیں۔ ان کا کہنا تھا کہ دنیا بھر میں ہیپاٹائٹس سی سے متاثرہ ممالک میں پاکستان سرفہرست ممالک میں شمار ہوتا ہے، اسی لیے اس بیماری کے تدارک کے لیے مؤثر اقدامات ناگزیر ہیں۔
