لاہور (نیوز ڈیسک) صوبہ پنجاب میں بعض ادویات کے مخصوص بیچز کو غیر معیاری قرار دیتے ہوئے ان کے استعمال اور فروخت پر پابندی عائد کر دی گئی ہے۔
ذرائع کے مطابق ڈرگ کنٹرول پنجاب نے میڈیکل اسٹورز پر دستیاب چند ادویات کے معیار پر اعتراض اٹھاتے ہوئے فوری کارروائی کی ہے۔ حکام کا کہنا ہے کہ انجکشن میں استعمال ہونے والا مخصوص پانی (واٹر فار انجیکشن) جراثیمی آلودگی کا شکار پایا گیا، جو مریضوں کے لیے خطرناک ثابت ہو سکتا ہے۔اسی طرح بیکٹیریل انفیکشن کے علاج میں استعمال ہونے والی ایک اینٹی بایوٹک بھی مطلوبہ معیار پر پوری نہیں اتری۔ ڈرگ ریگولیٹری اتھارٹی آف پاکستان کے مطابق اس دوا کے استعمال سے خون میں انفیکشن جیسے مسائل پیدا ہونے کا خدشہ ہے۔
اطلاعات کے مطابق یہ ادویات لاہور اور کراچی کی بعض دوا ساز کمپنیوں کی تیار کردہ ہیں۔ حکام نے تمام فارمیسیز اور میڈیکل اسٹورز کو ہدایت جاری کی ہے کہ متاثرہ بیچز کو فوری واپس لیا جائے اور ان کی فروخت مکمل طور پر روک دی جائے۔
ادویات کے معیار سے متعلق مزید تحقیقات جاری ہیں، جبکہ شہریوں کو مشورہ دیا گیا ہے کہ کسی بھی مشکوک دوا کے استعمال سے قبل مستند ڈاکٹر یا فارماسسٹ سے رہنمائی ضرور حاصل کریں۔
