کراچی(این این آئی)سربراہ انڈس اسپتال ڈاکٹر عبدالباری نے کہا ہے کہ چین میں تیار کورونا ویکسین کے کراچی میں بھی ٹرائل ہوں گے۔اپنے ایک بیان میں ڈاکٹر عبدالباری کا کہنا تھا کہ ڈرگ ریگولیٹری اتھارٹی نے ویکسین کے ٹرائل کی منظوری دے دی ہے۔ان کا یہ بھی کہنا تھا کہ ایک ٹرائل کا منصوبہ انڈس اسپتال اور جامعہ کراچی مل کر کریں گے۔ڈاکٹر عبدالباری نے کہا کہ

چین میں تیار ویکسین کے دو فیز پر ٹرائل چین اور دیگر ممالک میں ہوچکے ہیں۔انہوں نے کہاکہ تیسرے فیز کے ٹرائل کے لیے قومی ادارہ صحت نے منظوری مانگی تھی، تاہم ڈریپ نے قومی ادارہ صحت کے اشتراک سے دو منصوبوں کی منظوری دی ہے۔سربراہ انڈس اسپتال نے کہا کہ ٹرائل کے مکمل ہونے میں تین سے 6 ماہ کا وقت لگ سکتا ہے۔