اسلام آباد (این این آئی) وفاقی وزیر برائے معاشی امور حماد اظہر نے کہاہے کہ لاہور سے انصاف کارڈ کا آغاز کررہے ہیں، پنجاب میں تقریباً 4 کروڑ افراد انصاف صحت کارڈ ست مستفید ہوں گے۔پاکستان تحریک انصاف کے رہنما و وفاقی وزیر برائے معاشی امور حماد اظہر نے جاری بیان میں کہا کہ انصاف کارڈ وزیر اعظم پاکستان عمران خان صاحب کا وعدہ تھاجس کا آغاز لاہور سے کررہے ہیں، انصاف کارڈ کے حامل

افراد 7 لاکھ 20 ہزار تک کا علاج نجی ہسپتالوں میں کرواسکیں گے۔حماد اظہر نے واضح کیا کہ انصاف کارڈ کی سہولت80 لاکھ خاندانوں کو فراہم کی جائے گی جبکہ صرف لاہور میں ساڑھے 4 لاکھ گھروں کو کارڈ کا اجراء کیا جائے گا۔انہوںنے کہاکہ نصاف صحت کارڈبلاتفریق کسی بھی شخص کودیاجائیگا۔وفاقی وزیر برائے معاشی امور نے کہاکہ ملکی معیشت سے متعلق سخت فیصلے کرنے پڑے جس کے بعد روپیکی قد رمیں بہتری آئی ہے، نچلے طبقے کو اوپر لانا ریاست کی ذمہ داری ہے۔انہوں نے سابقہ حکومتوں پر طنز کرتے ہوئے کہا کہ خزانہ سوچ رہا ہے کہ ابھی تک ہمیں کوئی لوٹنے نہیں آیا، مسلم لیگ نواز خزانے کو خالی چھوڑ کر گئی تھی لیکن موجودہ حکومت نے جو مشکل فیصلے کیے اس کے ثمرات نظر آرہے ہیں۔حماد اظہر نے واضح کیا کہ حکومت اب تک 10 ارب ڈالر کا قرضہ واپس کرچکی ہے انشاء اللہ معیشت کے اندر استحکام نظر آئیگا، ملکی استحکام کو کسی طور خطرے میں نہیں ڈالا جائیگا ،تمام ادارے ایک پیج پر ہیں اب یہ بات کسی کو نظر آئے یا نہ آئے5 سال کے اندر تمام ادارے مشترکا کاوش سے اس ملک کو عظیم تر بنائیں گے۔انہوں نے کہا کہ بجلی کی قیمتیں بڑھیں ضرور ہیں لیکن 82 ارب روپے کی بجلی چوری بھی روکی ہے۔انہوںنے کہاکہ ہمارے ملک کی 70فیصدآبادی زراعت سے وابستہ ہے،صنعت کاروں سے پوچھیں کہ میٹنگ کیسی رہی،ملاقات میں کاروباری حضرات،صنعت کارموجودتھے، اسی لیے صنعتکاروں نے اس بات کا اعتراف کیاہے کہ واقعی حکومت کومشکل فیصلے کرنے پڑے۔حماد اظہر کے مطابق مدارس کے بچوں کو سیاسی ہتھکنڈوں میں استعمال ہونے نہیں دیں گے۔وفاقی وزیر برائے معاشی امور کے مطابق 29ممالک سے ڈیٹاآیاہے،ابھی بھی پاکستانیوں کے11ارب ڈالرباہرہیں،سابق وزیر خزانہ اسحاق ڈارنے اسمبلی فلورپرخود کہاتھا200ارب ڈالربیرون ممالک پڑے ہیں۔‎