اسلام آباد(مانیٹرنگ ڈیسک)فالج کا مرض جان لیوا تو نہیں لیکن انتہائی اذیت ناک ضرور ہے ،فالج کا مریض ہر پل ہر ضرورت کیلئے دوسروں کے رحم و کرم پر ہوتا ہے لیکن اب پریشان ہونیکیضرورت نہیں کیونکہ فالج کے مریضوں کیلئے خوشخبری ،اب وہ بھی اپنے پیروں پر کھڑے ہوں گے۔سائنسدانوں کی تیار کردہ نئی ڈیوائس سے فالج کے مریض اپنی مشکل پر قابوپاسکیں گے۔ ماہرین نے رپورٹ میں بتایا ہے کہ ڈیوائس کو 2 بندروں میں استعمال کیا گیا،جنہوں نے اسے اپنے فالج زدہ پیروں کے لئے کامیابی سے استعمال کیا۔
دماغ سے کنٹرول ہونے والی یہ ڈیوائس ایک بین الاقوامی ٹیم نے تیار کی اور امید ہے کہ انسانوں کے استعمال کے لئے جلد ہی اس کا تجربہ کیا جائے گا۔عالمی ٹیم کے ایک رکن کا کہناہے کہ پہلی مرتبہ ہم اس بات کا تصور کر سکتے ہیں کہ مکمل طور پر فالج زدہ انسان دماغ سے چلنے والی اس ڈیوائس کے ذریعے اپنی ٹانگیں استعمال کر سکے گا۔ یہ ڈیوائس دماغ سے ملنے والے سگنل کو ڈی کوڈ کرکے پیر چلانے میں مدد کرے گی۔ یہ ڈیوائس سوئٹزر لینڈ میں تیار کی گئی ہے اور اس کے اہم اجزا کی تیاری میں امریکی یونیورسٹی اور جرمنی کی ایک کمپنی نے حصہ لیا ہے۔
