اسلام آباد (آئی این پی) عالمی ادارہ صحت نے پشاور کو فضائی آلودگی کے حوالے سے دنیا کا دوسرا اور راولپنڈی کو چوتھا بدترین شہر قرار دیدیا۔ تفصیلات کے مطابق عالمی ادارہ صحت نے فضائی آلودگی کے حوالے سے دنیا کے بیس آلودہ ترین شہروں سے متعلق رپورٹ جاری کردی۔ دنیا کے بیس آلودگی والے شہروں میں نائیجیریا کا اونیتاشا پہلے‘ پاکستان کا پشاور دوسرے‘ ایران کا زیبل تیسرے اور پاکستان کا ہی راولپنڈی چوتھے نمبر پر ہیں۔ فہرست میں نائیجیریا کا کادونا پانچویں اور سعودی عرب کا ریاض ساتویں نمبر پر ہے۔ جبکہ پاکستان کا سب سے بڑا شہر کراچی لسٹ میں 14 ویں نمبر پر ہے۔ عالمی ادارہ صحت کی رپورٹ میں کہا گیا ہے کہ فضا میں کاربن ڈائی آکسائیڈ گیس کی تعداد 10 فیصد مقرر ہے جبکہ پشاور کی فضا میں فی ملین ذرات کی تعداد 540 تک پہنچ چکی ہے۔ گندگی کے ڈھیر‘ نکاسی آب اور آلودگی کی وجہ سے پشاور کی فضا ابر آلودہ ہوچکی ہے۔ پشاور میں روزانہ آٹھ لاکھ گاڑیوں کی آمد ہوتی ہے۔