اونٹاریو(نیوز ڈیسک) ماہرین کا کہنا ہےکہ کمزور مصافحہ کرنے والے افراد مستقبل میں ہارٹ اٹیک کا شکار ہوسکتے ہیں جو ان کی کم عمری میں موت کی وجہ بھی بن سکتی ہے۔
لینسٹ نامی تحقیقی جریدے میں شامل ایک مطالعے میں کہا گیا ہے کہ اگرکوئی شخص دوسرے سے جتنی کمزوری سے مصافحہ کرتا ہے مستقبل میں اسے عارضہ قلب کا اتنا ہی خطرہ ہوسکتا ہے۔ ماہرین بے دلی اور نرمی سے ہاتھ ملانے کو مردہ مچھلی کا مصافحہ بھی کہتے ہیں جو کمزور پٹھوں اور کسی بڑھتی ہوئی بیماری کی وجہ بھی ہوسکتا ہے۔
ماہرین کے مطابق پٹھوں خصوصاً انسانی گرفت میں کمی معذوری، بیماری یہاں تک کہ کم عمری میں موت کو بھی ظاہر کرتے ہیں۔ ماہرین نے مطالعے میں 17 ممالک کے ایک لاکھ 40 ہزار افراد کو شامل کیا جن کی عمر 35 سے 70 برس تھی، دوران تحقیق ان افراد میں خاص آلات کے ساتھ 4 سال تک ان افراد کے ہاتھوں کی گرفت کی شدت نوٹ کی گئی۔
ماہرین کے مطابق اگرکسی کی ہاتھوں کی گرفت میں 5 کلوگرام کمی ہو تو اس کے عارضہ قلب میں مبتلا ہونے کے خطرات 17 فیصد تک بڑھ جاتے ہیں اسی طرح کمزور مصافحے سے ثابت ہوا کہ وہ مریض فالج (اسٹروک)،دل کے دورے اور کینسر کی جانب بڑھ رہے ہیں کیونکہ یہ جسم میں پیدا ہوتی ہوئی بیماری کو ظاہرکرتا ہے۔