نیو یارک۔۔۔۔۔امریکہ میں محکمہ موسمیات نے ملک کی شمال مشرقی ریاستوں میں پیر کو شدید برفانی طوفان کی پیشنگوئی کی ہے۔ماہرین کا کہنا ہے کہ امریکہ میں فلاڈلفیا سے ریاست مین کے درمیانی علاقے میں اوسطاً دو فٹ تک اور نیویارک میں تین فٹ تک برف پڑ سکتی ہے۔نیویارک کے میئر بل ڈی بلازیو نے شہریوں سے کہا ہے کہ وہ ایسے طوفان کے لیے تیار رہیں جس کی ماضی میں کوئی مثال نہیں ملتی۔اتوار کو ایک پریس کانفرنس سے خطاب کرتے ہوئے ان کا کہنا تھا کہ یہ شہر کی تاریخ کا سب سے بڑا اور بدترین برفانی طوفان ہو سکتا ہے اور نیویارک کے شہری اسے نظرانداز نہ کریں۔انھوں نے عوام سے کہا کہ وہ پیر کو گھروں میں ہی رہیں اور انتہائی اشد ضرورت کے سوا باہر نہ نکلیں۔انھوں نے کہا کہ ’سب نیویارک والوں کے لیے میرا پیغام یہی ہے کہ وہ ان بدترین حالات کے لیے تیاری کریں جو آج تک ہم نے نہیں دیکھے۔ ہر قسم کے حفاظتی انتظامات کریں۔ یہی وہ وقت ہے کہ اس شدید موسم کے لیے تیاری کی جا سکتی ہے۔‘بل ڈی بلاسیو نے شہریوں کو متنبہ کیا کہ وہ ’طوفان کو نظرانداز نہ کریں۔ بدترین کے لیے تیار رہیں اور ہم مل کر اس کا مقابلہ کرنے میں کامیاب رہیں گے۔‘سب نیویارک والوں کے لیے میرا پیغام یہی ہے کہ وہ ان بدترین حالات کے لیے تیاری کریں جو آج تک ہم نے نہیں دیکھے۔ ہر قسم کے حفاظتی انتظامات کریں۔ یہی وہ وقت ہے کہ اس شدید موسم کے لیے تیاری کی جا سکتی ہے۔
بل ڈی بلاسیو، میئر نیویارک
انھوں نے کہا کہ یہ طوفان تاریخ میں برفباری کے ریکارڈ توڑ سکتا ہے۔امریکی موسمیاتی چینل کا کہنا ہے کہ طوفان اس علاقے میں پیر سے بدھ تک جاری رہے گا اور ’ممکنہ تاریخی سرد طوفان شمال مشرقی امریکہ میں پروازوں کی منسوخی اور تاخیر اور ہوائی اڈوں کی بندش کی وجہ بن سکتا ہے۔‘خبر رساں ایسوسی ایٹڈ پریس کا کہنا ہے کہ حکام نے طوفان کے خدشے کی وجہ سے پہلے ہی نیویارک، بوسٹن اور دیگر ہوائی اڈوں سے اڑنے اور وہاں اترنے والی سینکڑوں پروازیں منسوخ کر دی ہیں۔محکمہ موسمیات کے اندازوں کے مطابق نیو جرسی سے مشرقی میساچوسٹس تک چھ انچ سے ایک فٹ تک برف پڑ سکتی ہے جبکہ میری لینڈ اور پینسلوینیا میں چار سے آٹھ انچ برفباری کی پیشنگوئی کی گئی ہے۔بوسٹن کے میئر مارٹی والش نے بھی عوام سے کہا ہے کہ وہ ایک دوسرے کی مدد کریں: ’ہم بوسٹن کے ہر ایک شہری سے درخواست کرتے ہیں کہ وہ اپنے ہمسائے کی خبر گیری کرے چاہے وہ کوئی باہر پھرتا دکھائی دے یا آپ کے برابر والے مکان میں رہائش پذیر ہوں۔‘خیال رہے کہ امریکہ کی شمال مشرقی ریاستیں نومبر 2014 میں بھی شدید برفانی طوفان کی زد میں آئی تھیں جس سے ریاست نیویارک میں 7 جبکہ مجموعی طور پر 20 افراد ہلاک ہوئے تھے۔