لاہور۔۔۔۔۔ محمد عامر کو ا ئندہ ماہ ڈومیسٹک کرکٹ کھیلنے کی اجازت ملنے کا امکان ہے۔ذرائع کے مطابق ا ئی سی سی نے اسپاٹ فکسنگ کیس میں پابندی کا شکار پیسر کا انٹرویو کرلیا، رواں ماہ کے اجلاس میں حتمی فیصلہ کرلیا جائے گا۔ تفصیلات کے مطابق محمد عامر اور محمد اصف کے ساتھ ساتھ اس وقت قومی ٹیم کے سلمان بٹ پر2010 میں دورۂ انگلینڈ کے دوران لارڈز ٹیسٹ میں الزام عائد کیا گیا تھا انھوں نے ایک ڈیل کے تحت رقم کیلیے جان بوجھ کر نوبال کیں۔ائی سی سی نے 2011 میں تینوں پر پابندی عائد کردی تھی لیکن جج نے اس قانون پر تحفظات کا اظہار کرتے ہوئے اس پر نظرثانی کا مطالبہ کیا تھا، بعدازاں مختلف مراحل میں اینٹی کرپشن کوڈ میں ترمیم پر غور کیا گیا، ائی سی سی سے تعاون کرنے والے اچھے رویے کے حامل کرکٹرز کو پابندی کے خاتمے سے قبل ڈومیسٹک سطح پر کرکٹ کھیلنے کی اجازت دینے کا فیصلہ کیا گیا، نئے کوڈ میں شق رکھی گئی تھی کہ کھلاڑی کو ملکی سطح کے مقابلوں میں شرکت کیلیے اجازت طلب کرنا ہو گی جس پر ایک کمیٹی فیصلہ کریگی،محمد عامر نے بحالی کا پروگرام مکمل کرلیا تھا،ان پر عائد پابندی رواں سال اگست میں ختم ہوگی۔