ریاض۔۔۔۔ سعودی عرب کے ایک معروف عالم دین نے برف سے مجسمے بنانے کو غیر اسلامی قرار دے دیا ہے۔ غیر ملکی خبر رساں ادارے کے مطابق سعودی عالم شیخ محمد صالح المنجد سے سوال پوچھا گیا تھا کہ کیا برف سے مجسمے بنانا جائز ہے۔ جواب میں شیخ صالح المنجد نے کہا کہ برف سے مجسمے بنانے کی کسی بھی طرح اجازت نہیں ہے۔ کسی انسان کا برف سے مجسمہ بنانا ایک گناہ ہے اور اس کی اسلام میں اجازت نہیں ہے۔ انھوں نے اپنے فتویٰ میں مزید کہا ہے کہ اللہ نے لوگوں کو بے جان چیزوں درختوں، جہازوں، پھلوں اور عمارتوں وغیرہ کی تصاویر بنانے کی اجازت دی ہے۔ سعودی عالم کے اس فتوے سے سوشل میڈیا پر لفظی جنگ شروع ہو گئی ہے۔ بعض افراد اس فتوے کے حق میں جبکہ بعض اس کیخلاف شدید ردعمل دے رہے ہیں۔