اسلام آباد.. پاکستان تحریک انصاف کے چیرمین عمران خان اور اینکر پرسن ریحام خان بنی گالہ میں رشتہ ازدواج سے منسلک ہوگئے ہیں۔
عمران خان اور ریحام خان کے نکاح کی تقریب بنی گالہ میں ان کے فارم ہاؤس میں ہوئی، ان کا نکاح مفتی سعید پڑھایا جبکہ عمران خان کے دوست ذاکر خان اور عون چوہدری گواہ بنے۔ نوبیاہتا جوڑے نے ہم رنگ ملبوسات زیب تن کررکھے تھے۔ عمران خان نے کریم رنگ کی شیروانی پہنی ہوئی تھی جبکہ ریحام خان نے بھی اسی رنگ کے کپڑے پہن رکھے تھے۔ نکاح کی تقریب میں 10 سے 15 افراد ہی شریک تھے یہاں تک کہ عمران خان کی چاروں بہنیں اور دونوں بچے بھی غیر موجود تھے۔
نکاح کے بعد میڈیا سے بات کرتے ہوئے نکاح خواں مفتی سعید نے بتایا کہ نکاح کی تقریب میں کچھ خواتین تھیں جنہیں وہ نہیں پہچانتے، نکاح میں دلہن کا حق مہر ایک لاکھ روپے رکھا گیا ہے۔
واضح رہے کہ گزشتہ کئی روز سے عمران اور ریحام خان کی شادی کی خبریں میڈیا پر زینت بنی ہوئی تھیں اور خود عمران خان نے بھی دو روز قبل خوشخبری سنانے کا وعدہ کیا تھا۔
