کراچی، بکھرا ہوا اور بے ہنگم، خطرناک اور گرم، یہ ایسا شہر ہے جو آپ کو غصہ بھی دلاسکتا ہے اور آپ کو لبھا بھی سکتا ہے۔ یہاں ہر طرح کے لوگ پائے جاتے ہیں، اور آپ ان تمام طرح کے لوگوں سے ملیں گے۔
تیز چلنے والا اور تھوڑا سا جنونی، یہ ایسا شہر ہے جو آپ کو فوراً اپنا بنا لے گا۔
۔1آپ تحفظ کے معاملے میں زیادہ فکرمند نہیں رہیں گے
یہاں مسلح گارڈ عام رواج ہیں، جبکہ آپ خود بھی نو گو ایریاز جانا پسند نہیں کریں گے۔ لیکن عموماً زندگی اپنی رفتار سے جاری رہتی ہے۔ جب ہڑتالیں، لوٹ مار، اور ایسی ہی دیگر وارداتیں اتنی عام ہوں، تو اتنا زیادہ پریشان رہنا ایک مشکل کام ہے۔
کسی دوسرے شہر میں رہنے والے فکرمند رشتے دار کوئی بھی ڈراؤنی خبر سن کر آپ کو فون کریں گے، لیکن شاید آپ ان کی کال موصول ہونے پر کسی ریسٹورینٹ میں کھانے سے لطف اندوز ہورہے ہوں۔ جب تک گولیاں سنسناتی ہوئی آپ کے پاس سے نہ گزرنے لگیں، تب تک منصوبوں میں کوئی تبدیلی نہیں، اور اگر واقعی گولیاں چل بھی رہی ہوں، تب بھی آپ کی پریکٹس ایسی ہوگی کہ 10 منٹ سے بھی کم وقت میں شٹر بند کرکے محفوظ جگہ پہنچ جایا جائے۔
۔2 آپ بالکل سست ہو کر ملازمہ پر منحصر ہوجائیں گے
گھر کے کاموں میں مدد ایسی لگژری ہے، جس کی آپ کو فوراً عادت پڑ جائے گی۔ ملک سے باہر بھلے آپ نے پورے گھر کی صفائی کی ہو، کپڑے دھوئے ہوں، خریداری کی ہو، اور کھانا بھی پکایا ہو، لیکن اب یہاں آپ ایک کپ چائے بنانے کے لیے بھی نہیں اٹھنا چاہیں گے۔
۔3 آپ کو لوٹ لیا جائے گا
امید ہے کہ سب سے زیادہ برا صرف یہ ہوگا، کہ کوئی گن پوائنٹ پر آپ سے آپ کا والٹ یا موبائل فون چھین لے۔ کچھ ٹریفک سگنل اس بات کے لیے بہت بدنام ہیں، اور میرے ایک انکل تو لگاتار دو سگنلز پر ڈاکوؤں کا شکار بنے۔ امید ہے کہ آپ کو اغوا نہیں کیا جائے گا، اور نہ ہی ڈاکو آپ کے گھر پر ہلہ بول دیں گے، لیکن کراچی جیسے شہر میں کسی چیز کی کوئی گارنٹی نہیں دی جاسکتی۔
ایسا ہو ہی نہیں سکتا کہ آپ کے جان پہچان والے لوگوں میں کوئی اس تجربے سے نہ گزرا ہو۔
۔ 4آپ سفید اور خاکستری کپڑے زیادہ پہننے لگیں گے
معلوم نہیں یہ یہاں کے موسم کی وجہ سے ہے یا ہمارا اسٹائل، لیکن کراچی والے وائٹ، آف وائٹ، اور ایسے ہی دیگر رنگ زیادہ پہننا پسند کرتے ہیں۔ یہاں کچھ عرصہ رہیں، اور آپ کے وارڈ روب میں آہستہ آہستہ یہ رنگ زیادہ نظر آنے لگیں گے۔
۔5 آپ کی ڈرائیونگ خراب ہوجائے گی
ٹریفک قوانین کے بارے میں کراچی والوں کا ملا جلا رویہ آپ بھی جلدی ہی اپنا لیں گے۔
زیادہ تر ڈرائیور ٹریفک قوانین کو مکمل طور پر نظرانداز کردیتے ہیں، اور طاقتور ہی درست ہے کے قانون پر عمل کرتے ہیں۔ ہارن بادشاہ ہے اور راستہ دیا جانا ایک انہونی بات۔
آپ بھلے سنجیدہ ڈرائیونگ کرتے رہیں، لیکن ایک دن ایسا آئے گا کہ آپ خود کہیں گے ‘اگر انہیں ہرا نہیں سکتے تو ان جیسے بن جاؤ’۔
۔ 6جان لیں گے کہ بجلی اور پانی لگژری ہیں
کراچی پاکستان کے کئی دیہی علاقوں سے بہتر ہے، لیکن بیرونِ ملک جس طرح بلاتعطل سروسز ملتی ہیں، کراچی والوں کے لیے یہ خواب ہی ہے۔
وقت گزرنے کے ساتھ ساتھ آپ پانی کے ٹینکر اور اپنے جنریٹر پر زیادہ سے زیادہ بھروسہ کرنے لگیں گے۔
۔7 سن گلاسز تو آپ کے جسم کا حصہ بن جائیں گے
یہاں سال کے 365 دن سورج چمکتا ہے۔ جو لوگ اداس موسموں میں رہنے کے عادی ہیں، ان کے لیے ایسی تیز اور چبھتی ہوئی دھوپ بہت پریشان کن ہوسکتی ہے۔ اگر آپ سن گلاسز کے پیچھے پناہ نہیں لیں گے، تو آپ پاگل ہوجائیں گے۔
۔ 8آپ کا وزن کم ہوجائے گا
کراچی کا ایک اوسط درجے کا شہری ملک کے دیگر حصوں میں رہ رہے اپنے جیسے دوسرے لوگوں سے زیادہ ہلکے وزن کا ہوگا۔ آپ جم جوائن کرنے لگیں گے، ورزش کرتے نظر آئیں گے، یا پھر ڈائٹ پلان پڑھنا شروع کردیں گے۔
اگر آپ بیرونِ ملک سے آرہے ہیں، تو معدے کے بار بار کے انفیکشن سے ہی آپ کا وزن کچھ کم ہوجائے گا جب تک کہ آپ کو یہاں کے مقامی جراثیم کی عادت پڑے۔
۔ 9چائے پانی تو کچھ بھی کرانے کے لیے ضروری ہے
چائے پانی کا لینا دینا چائے اور پانی سے نہیں، اور کام نکلوانے سے اس کا پورا لینا دینا ہے۔ یہ کوئی اچنبھے کی بات نہیں کہ پاکستان دنیا کے کرپٹ ترین ملکوں میں شامل ہے۔
۔ 10آپ کے دوست آپ کے خاندان کا حصہ بن جائیں گے
کراچی میں رہنا ایک چیلنج کی طرح ہوسکتا ہے، لیکن یہاں پر دنیا کے سب سے نرم مزاج لوگ بھی پائے جاتے ہیں۔
آپ ایسے کئی دوست بنائیں گے، جو بالکل آپ کے خاندان کا حصہ ہوجائیں گے۔
Courtesy: dawn news
