ماسکو۔۔۔۔روس کے حکام نے کہا ہے کہ نوجوانوں کو سیلفی لینا بند کر دینا چاہیے کیونکہ سیلفی لینے سے سر میں جوئیں پڑ سکتی ہیں۔ غیر ملکی خبر رساں ادارے کے مطابق یہ تنبیہہ روس کے علاقے کورسک کے محکمے نے کی ہے۔ کورسک کے اس محکمے کا کہنا ہے کہ سیلفی کے لئے لوگ سر جوڑتے ہیں اور اس وجہ سے جوئیں ایک سر سے دوسرے سر میں منتقل ہو سکتی ہیں۔ حکام کا کہنا ہے کہ پہلے ہی سے کورسک میں ان بچوں کا سکول میں داخلہ ممنوع ہے جن کے سر میں جوئیں ہیں۔ ماضی میں کورسک کے اس محکمے کے فیصلے کافی متنازع رہے ہیں۔ اس کے سابق سربراہ نے ایک بار کوؤں کو مارنے کا کہا تھا کیونکہ ان سے برڈ فلو پھیلتا ہے۔ اسی سابق سربراہ نے ان ممالک سے اشیائے خورونوش اور مشروبات درآمد کرنے پر پابندی کی تجویز پیش کی تھی جن سے کریملن کے روابط اچھے نہیں ہیں۔ جوؤں کے حوالے سے اس محکمے کے فیصلے کا سماجی رابطوں کی ویب سائٹ پر مذاق اڑایا جا رہا ہے۔ ایک شخص سوال کیا کہ کیا یہ محکمہ یہ کہہ رہا ہے کہ زیادہ تر روسی نوجوانوں کے سر میں جوئیں ہیں؟۔