اسلام آباد(نیوز ڈیسک)نازش جہانگیر نے شریکِ حیات کے انتخاب سے متعلق اپنی خواہشات بتاتے ہوئے کہا ہے کہ وہ ماضی میں دل ٹوٹنے کا تجربہ رکھنے والے شخص کو بھی زندگی کا ساتھی بنانے پر خوش ہوں گی۔
اداکارہ نازش جہانگیر نے ایک حالیہ انٹرویو کے دوران اپنی شادی اور مستقبل کے شریکِ حیات سے متعلق سوالات کے جواب دیے اور کہا کہ شوہر کے انتخاب کے حوالے سے ان کی کوئی غیر معمولی شرائط نہیں ہیں۔اداکارہ کے مطابق وہ ایسا شخص چاہتی ہیں جو مزاج اور طبیعت میں ان سے مماثلت رکھتا ہو اور جس کے ساتھ زندگی کے مختلف حالات کو خوشی سے گزارا جاسکے۔نازش جہانگیر کا کہنا تھا کہ ان کی خواہش ہے کہ وہ اپنے ساتھی کے ساتھ مل کر ہنسیں، خوشیاں بانٹیں، تفریح کریں اور اگر کبھی اختلاف ہوجائے تو بحث کے بعد بھی ایک دوسرے کے ساتھ زندگی کا سفر جاری رکھ سکیں۔ان سے جب یہ سوال کیا گیا کہ کیا وہ ایسے شخص سے شادی پر آمادہ ہوں گی جس کا ماضی میں دل ٹوٹ چکا ہو، تو اداکارہ نے اس کا جواب اثبات میں دیا۔انہوں نے کہا کہ وہ ایسے شخص کو نہ صرف قبول کریں گی بلکہ انہیں اس بات پر خوشی ہوگی کہ وہ اس کے جذباتی زخم بھرنے اور اسے ماضی کے کرب سے باہر آنے میں معاون ثابت ہوں۔
نازش جہانگیر کے مطابق وہ چاہیں گی کہ ان کا ہونے والا شوہر یہ محسوس کرے کہ انہوں نے اس کی زندگی میں مثبت کردار ادا کرتے ہوئے اسے ٹوٹے ہوئے دل سے سنبھلنے میں مدد دی۔واضح رہے کہ نازش جہانگیر نے حال ہی میں اے آر وائی ڈیجیٹل کے ڈرامہ سیریل ’ٹوٹا ہوا دل‘ میں مرکزی کردار ’سمین‘ نبھایا ہے، جبکہ ڈرامے میں آغا علی نے ان کے شوہر کا کردار ادا کیا ہے۔
