اسلام آباد (نیوز ڈیسک)ہالی ووڈ کی معروف فلم ’اسپائیڈر مین: نو وے ہوم‘ میں نیڈ کی دادی (لولا) کا کردار ادا کرنے والی سینئر اداکارہ میری ریویرا 83 برس کی عمر میں دنیا سے رخصت ہو گئی ہیں۔
ان کے انتقال کی خبر سامنے آتے ہی مداحوں اور شوبز انڈسٹری میں غم کی لہر دوڑ گئی۔خاندانی ذرائع کے مطابق میری ریویرا کو شدید فالج کا حملہ ہوا تھا، جس کے بعد انہیں انتہائی نگہداشت میں وینٹی لیٹر پر رکھا گیا، تاہم وہ جانبر نہ ہو سکیں۔ امریکی میڈیا کے مطابق انہوں نے امریکی ریاست ہوائی کے شہر ہونولولو میں آخری سانس لی، جبکہ ان کی پیدائش 2 جون 1943 کو فلپائن کے شہر ایلوئیلو میں ہوئی تھی۔اہلِ خانہ نے بتایا کہ میری ریویرا کو اپنی فلمی زندگی میں ’اسپائیڈر مین: نو وے ہوم‘ کا حصہ بننے پر خصوصی فخر تھا اور وہ اس کردار کو اپنے کیریئر کی یادگار کامیابیوں میں شمار کرتی تھیں۔
فلم میں اگرچہ ان کا کردار محدود وقت کے لیے تھا، لیکن انہوں نے نیڈ (جیکب بیٹالون) کی دادی کے روپ میں اپنی سادہ مگر مؤثر اداکاری سے ناظرین کے دل جیت لیے۔ ان کے مناظر میں اینڈریو گارفیلڈ کے اسپائیڈر مین، نیڈ اور ایم جے (زینڈایا) بھی شامل تھے، جنہیں فلم کے دلچسپ اور یادگار لمحات میں شمار کیا جاتا ہے۔ایک مقبول منظر میں میری ریویرا کا کردار پیٹر پارکر سے گھر کی چھت پر چڑھ کر مکڑی کے جالے صاف کرنے کی فرمائش کرتا ہے، جس نے سنجیدہ ماحول میں خوشگوار رنگ بھر دیا اور شائقین کی بھرپور توجہ حاصل کی۔مرحومہ اپنے شوہر الیگزینڈر ریویرا اور چار بچوں، کارمیلا، پال، ایڈون اور اینجلا کو سوگوار چھوڑ گئی ہیں۔ ان کے انتقال پر مداحوں اور ساتھی فنکاروں نے سوشل میڈیا پر تعزیتی پیغامات جاری کرتے ہوئے ان کی خوش مزاج شخصیت، شفقت اور متاثر کن اداکاری کو خراجِ تحسین پیش کیا۔ ان کا مختصر مگر یادگار کردار انہیں طویل عرصے تک شائقین کے دلوں میں زندہ رکھے گا۔
