کراچی (این این آئی) سینئر اداکارہ اسما عباس نے 60سال سے زائد عمر کی خواتین کو مناسب شریک حیات ملنے کی صورت میں شادی کرنے کا مشورہ دے دیا۔

نئے وی لاگ میں اسما عباس نے کہا ہے کہ شاید آپ نے میری پرانی ویڈیو پوری نہیں دیکھی میں نے جس میں کہا تھا کہ اگر بڑی عمر کی خواتین کو کوئی اچھا مرد مل جائے تو انہیں ضرور شادی کر لینی چاہیے، کیونکہ بڑی عمر میں انسان کو کئی مسائل کا سامنا کرنا پڑتا ہے۔انہوں نے اپنی بہن بشری انصاری کا حوالہ دیتے ہوئے کہا کہ اگر آپ میری باجی بشری انصاری کی بات کریں تو انہیں ایک نہایت اچھے شوہر ملے ہیں، ایسے لوگ بہت کم ملتے ہیں، ان جیسا کوئی نہیں، اگر آپ کو بھی ایسا شخص مل جائے تو ضرور شادی کر لیں، اسی طرح ثمینہ احمد کو بھی بہت اچھے شریکِ حیات ملے ہیں۔

اسما عباس نے کہا کہ میرا کہنا صرف یہ تھا کہ اگر آپ کو اچھا انسان مل جائے تو شادی کر لیں، ورنہ دنیا ریڈ فلیگز اور مسائل سے بھری پڑی ہے۔انہوں نے کہا کہ بڑھاپے میں انسان کو کسی ایسے ساتھی کی ضرورت ہوتی ہے جو دیکھ بھال کرے، حتی کہ وقت پر دوائیں بھی دے سکے، اسی لئے مناسب شریکِ حیات ملنے کی صورت میں شادی کر لینا بہتر فیصلہ ہو سکتا ہے۔