اسلام آباد (نیوز ڈیسک) پاکستانی اداکارہ مومنہ اقبال کا ماضی میں دیا گیا ایک انٹرویو ان دنوں سوشل میڈیا پر تیزی سے وائرل ہو رہا ہے،
جس میں انہوں نے تعلقات اور بریک اپ کے بعد رویوں سے متعلق اپنی رائے کا اظہار کیا تھا۔
اداکارہ اس وقت مسلم لیگ (ن) کے رکنِ صوبائی اسمبلی ثاقب چدھڑ کے ساتھ مبینہ تنازع کے باعث خبروں میں ہیں، جبکہ اس معاملے کی تحقیقات نیشنل سائبر کرائم انویسٹی گیشن ایجنسی (این سی سی آئی اے) کر رہی ہے۔
وائرل ہونے والے انٹرویو میں مومنہ اقبال نے کہا تھا کہ اکثر دیکھا جاتا ہے کہ دو افراد جو کبھی ایک دوسرے کے قریب رہے ہوں، بعد میں ایک دوسرے کے بارے میں انتہائی نامناسب انداز میں بات کرتے ہیں، چاہے وہ سوشل میڈیا ہو یا حقیقی زندگی۔
انہوں نے کہا کہ اگر کسی کے ساتھ زندگی کا اچھا وقت گزارا ہو تو تعلق ختم ہونے کے بعد بھی اس شخص کی عزت اور وقار برقرار رکھنا چاہیے۔ اداکارہ کے مطابق انہیں یہ بات پسند نہیں کہ کوئی مرد کسی خاتون کے ساتھ تعلق میں رہنے کے بعد اس کے بارے میں منفی تبصرے کرے۔
مومنہ اقبال نے گفتگو کے دوران یہ بھی کہا کہ انہیں ایسے رویے پر لڑکیوں سے بھی اعتراض ہوتا ہے کہ اگر تعلق درست نہیں تھا تو پھر اتنی دیر تک اسے برقرار کیوں رکھا گیا۔
پروگرام کے دوران تعلقات سے متعلق گفتگو کرتے ہوئے اداکارہ جذباتی بھی ہو گئی تھیں، جس کی ویڈیو اب مختلف سوشل میڈیا پلیٹ فارمز پر زیرِ بحث ہے۔
